أفضل زيوت مغذية للشعر وأفضل سيروم للشعر

طبعا منتجات كريستاس غنية عن التعريف
وهي رقم واحد دلوقتي تقريبا لكن عيبها اسعارها العالية
الوصف:اكسير متعدد المهام ... سيروم وزيت معالج في نفس الوقت
هو عبارة عن مجموعة مركزة من الزيوت ...بيستعمل لعلاج الشعر قبل غسيله
وهو بيحسن من حالة الشعر الجاف كثيرا
المكونات :بيتكون من 4 زيوت اساسية ( زيت الذرة وزيت الكاميليا وزيت الاركان وزيت الPracaxiوكل الزيوت ده معروفه بفوائدها ومفعولها المضاد للاكسدة )
السعر :55 دولار ...اي مايعادل 400 جنيه مصري يابلاش
المعدل :9 \10
الزيت متوافر من خلال النت وكمان في الصيدليات ومحلات التجميل الكبيرة ...انا بجيب السيروم بتاعه من محل مستحضرات تجميل ...بس بييجي بالتوصية

2-زيت الشعر الاسطوري من لوريال

L'ORÉAL PROFESSIONNEL MYTHIC OIL

الوصف:مجموعة من اجود الزيوت المغربية (واحنا عارفين ان الزيوت المغربية هي الافضل في العالم دلوقتي )
وهو مخصص لمعالجة الشعر المصبوغ والمقصف والجاف
السعر:32 دولار ...بمايعادل210 جنيه تقريبا
المعدل :8\10

3-زيت الشعر من موشنز (للعلاج الطبيعي للشعر وفروة الرأس)
MOTIONS MARULA NATURAL THERAPY HAIR & SCALP OIL



الوصف:ده بيحتوي علي زيت Marula اللي بييجي من غابات افريقيا وهو معروف بخصائصه المضادة للاكسدة
كمان بيحمي الشعر من الاضرار الناتجة عن التعرض للشمس كمان يحتوي علي العسل اللي بيدي لمعة للشعر
كمان المنتج ده بيحتوي علي الكاموميل اللي معروف بخواصة المهدئه لفروة الرأس
رغم ان منتجات موشنز معروف انها للشعر الجاف جدا ...لكن ممكن استخدام الزيت ده لجميع انواع الشعر بكمية صغيرة جدااااااااا
السعر:7 دولار ...حوالي:45 جنيه
المعدل :8\10
(منتجات موشنز متوافرة في مصر ) فياريت االي جربه يفيدنا ويقولنا
وده انا شفته عندنا في مصر في سيتي ستارز وب40 جنيه تقريبا وناويه اجربه برده ان شاء الله

4-زيت GOT2B من تشوارتسكوف


الوصف:بيتكون من مجموعة من اجود الزيوت زي زيت الاركان زيت بذور العنب وزيت Marula
لذلك الزيت ده مناسب تماما للشعر المجعد والجاف والمقصف
وبيستخدم للشعر الجاف والرطب ...وبينصحك الخبراء بتدليك شعرك يوميا بنقط صغيرة منه ...وهتلاقي شعرك اتغير 180 درجة
السعر:6 دولار ..حوالي:40 جنيه مصري
منتجات تشوارتسكوف متوافرة في مصر ومنها حمام كريم بوناويل وسيرومcitre shine ..فاعتقد ده ممكن نلاقيه ..ياريت اللي يشوفو يقولنا فين ؟!!
المعدل:8\10


5-الزيت المغذي من دوف DOVE NOURISHING OIL CARE DETANGLER



الوصف:الزيت ده مكوناته الاساسية زيت الاركان (لاحظوا انو عامل مشترك مابين كل المنتجات تقريبا )+ زيت اللوز الحلو
ده بأه ليه عدة استخدامات ..اولا شايفين الازازة هو بيتكون من نوعين زيت خفيف (زيت اللوز الحلو )وزيت تقيل (وده زيت الاركان المغربي)
فقبل الاستخدام لازم نرجه كويس ...وبيتحول لشكل شبه الكريم كده
وممكن تستخدميه ...كبلسم بيتساب جوه الشعر ...او سيروم علي الاطراف ...او زيت مغذي لفروة الراس
او بعد ماتكوي شعرك او تعملي سشوار ترجيه كويس وترشي رشتين من بعيد ...هيدي لمعة لشعرك
السعر:6 دولار ...حوالي 40 جنيه مصري
المعدل :8\10

6-معالج الشعر من Ojon



الوصف:الزيت ده اول مرة اشوفه او اسمع عنه
هو بيتكون من 3 زيوت زي مانتوا شايفين ...الزيت الاحمر ده زيت من جوز ال ojon . حاجه كده شبة البندق بس متوافر بس في تاهيتي ..وده معروف بخواصه المضادة للاكسدة
الزيت الشفاف اللي في النص ده ...هو زيت من تاهيتي (شبه زيت جوز الهند ) وده بيحمي الشعر من العوامل الخارجيه
الزيت الاصفر ..ده زيت الKukuiاللي معروف بخواصة المرطبه للشعر شديد الجفاف
هترجي الازازة كويس وتدلكي شعرك جاف او رطب
...النتيجة ..شعر لامع ...عالي الترطيب ...صحي ...متغذي
السعر :35 دولار ...حوالي230 جنيه مصري
المعدل :8\10

7-سيروم الشعر بزيت الاركان المغربي من افون....AVON ADVANCE TECHNIQUES
360 NOURISHING MOROCCAN ARGAN OIL LEAVE-IN TREATMENT



الوصف: السيروم ده المكون الاساسي فيه هو (زيت الارجان المغربي ) ..
والخبراء بيقولوا انه خفيف ويشبه سيروم الوجه ...لان الشعر بيتشربه بسهوله
وهو بيتحط علي الشعر الجاف والرطب ...وبيحمي من حرارة السيشوار والمكواة ...
السعر:56 جنيه مصري ... ده تبع شركة افون وموجود في العروض علطول
في العروض بينزل لحوالي من 30 الي 40 جنيه مصري ..حسب العرض
وده ناوية اجربه ان شاء الله لانه متوافر وسعرة رخيص
المعدل:8\10

8-زيت شعر الارجان المعالج من JOSIE MARAN



الوصف : هو عبارة عن مجموعة من انبولات الشعر .. كل انبوبة 10 مل ...المكون الرئيس لها هي زيت الارجان (لاحظوا ان كل الانواع اللي فاتت رخيصة او غاليه فيها الزيت ده )
لو كنت مش من النوع اللي بيحب يدهن شعرة بمواد تقيلة .. الخبراء بينصحوكي بالزيت ده ...عبارة عن زيت تدهني بيه فروة رأسك وبعدين تغسليه والغريب انهم بيقولوا انو بيتفاعل مع الشعر لما تحطي علي شعرك الميه
يعالج الشعر ويغذيه وبعد 4 مرات هتلاحظي الفرق الرهيب في شعرك
السعر:36 دولار ..اي حوالي 235 جنيه مصري
المعدل :8\10

بس كده خلصت الحمد لله ياارب يكون الموضوع عجبكوا ...
ومتنسوش التقييم
كل واحدة جربت حاجه منهم او ناويه تجربه ياريت تقول وتشاركنا برأيها
وتقولي جابته منين وبكام وكل واحدة بردو تقولنا ايه النوع اللي بتستخدمه دلوقتي وحلو ولا لأ
عشان نتبادل معلوماتنا وخبراتنا
انا يابنات عن نفسي ناوية اجرب بتاع موشنز او افون ودول موجودين في مصر . وسعرهم رخيص نسبيا
..و بعدين ناوية اجيب الكريستاس ان شاء الله لان السيروم بتاعة تحففففففففففففة
وانا حاليا بستخدم Citre Shine من تشوارتسكوف وهو الماني سعرة 45 جنيه تقريبا و100 مل
وده صورته وهو في منه نوعين نوع للشعر المصبوغ ونوع لكل انواع الشعر ....انا بستخدم اللي لكل انواع الشعر