نهاية حلم

السلام عليكم

اسمحوا لى احكى لكم قصه صغيره عن شاب بسيط من مدينه من مدن مصر ام الدنيا

حكاية شاب ضاقت الحياه فى وشه فقرر انه يبحث عن اى مصدر للدخل من ضمنها الفوركس اتعلم و اتدرب و قرا و عمل كل اللى عليه

فى شهر 7 السنه الماضية جمع 200 دولار سلف و جمعية و قرر انه يبدا التداول

فى البدايه كات الاحوال سيئة مكسب ثم خساره و هكذا حتى عرف طريق الارباح و شاف حسابه بيكبر امامه و بعد سنه ربنا وفقه و 200 دولار تحولوا الى 6500 دولار

خاف يفرح لاننا فى بلدنا الغاليه الفرح مالوش مكان

اول خوفه من الشركه بدا يسحب الفلوس جزء جزء و الشركة طلعت محترمه و حولت له 5500 دولار اللى طلب سحبهم على حسابه فى البنك الالكترونى اللى حسابه متفعل فيه

تانى خوف من الوسطاء المهم بحث لحد ما لقى و سيط و اتفق معاه على الاستلام يد بيد

سافر الى القاهرة و قابل الوسيط و طلع راجل محترم و سلمه فلوسه

صاحبنا شعر اخيرا بانه اصبح محترم و انه هيغير نظرة الكل له و هيعرفوا انه مش بيلعب على الكمبيوتر و انه بيشتغل و شغل يجيب فلوس مش عايز عربيه و لا انه يصيف فى المالديف

والله العظيم دى كانت اهم امنيه عنده انه يورى الفلوس لاهله اللى بيتعاملوا معاه على انه عاطل عاله عليهم و خلاص الحلم اتحقق

اخذ الفلوس و جرى على موقف رمسيس و ركب البيجو عشان يروح و قبل ما يوصل بلده ب 40 كيلو توقفه كمين شرطة عايزيين يشوفوا البطايق واحد امين شرطه شاف معاه كيس ساله ايه ده قال له كيس فلوس

جايب الفلوس دى منين رد عليه و قال له فلوسى هو ممنوع قال له اه ممنوع و اركب البوكس لانى مشتبه فيك

بعد ما راح القسم و المحضر و خلافه قال له الظابط ان الفوركس غير مسموح به فى مصر يا اما تتنازل عن الفلوس دى و تتصالح مع الدوله المحترمه يا اما محضر و عرض على النيابه و فى الاخر هتتحبس و برضه هنصادر الفلوس

امام دموع ابوه و امه تنازل عن الفلوس و شاف كل حاجه بتطير و حلمه بيموت و غير كده اصبح مشبوه لانه بيعمل بتجاره غير مسموح بها فى القانون المصرى المبجل

اما رجع البيت لقى ابوه مكسر الكمبيوتر و حلفه على مصحف ما يشتغل الشغلانه دى تانى

هى دى حكايتى بكل بساطه و اختصار

لا حول ولا قوة إلا بالله
ربنا يعوض عليك
بس نصيحة بشكل عام، بلاش العنترية في الكلام مع آمناء الشرطة او الشرطة بشكل عام
خليهم يشوفوا شغلهم وباسلوبك ماحدش هيكلمك وكان ممكن تقول اي شئ بعيدا عن الفوركس عشان ماحدش يتلكك لك
وبرضه اما يكون المبلغ كبير
خليه عن طريق البنك افضل واضمن

ربنا يعوض عليك وماتزعلش رب ضارة نافعة

التوقيع

حلم المليون

ربنا يعوض عليك يا اخي

احسن شي سافر برا واشتغل براحتك واترك الحكومات والعقليات الخبيثه

منتهى الظلم

يا الله ربنا يعوض عليك
حاول تشوف محامي كويس يشوفلك اللي حصل معاك قانوني فعلا ولا لا
ام الدنيا في الظلم؟

التوقيع

وَمَا أُوتِيتُمْ مِنَ الْعِلْمِ إِلا قَلِيلا

هل مبلغ 6500€ كبير؟

ربنا يعوض عليك
ولا تدري اين الخير
ثق بالله سبحانه وتعالي

المبلغ ليس بكبير لكن انت المفروض تكون الفلوس في شنطة عادية اللي بتكون عالدهر او شنطة كتف احنا علطول بنسحب فلوس وعادي جدا مبيحصلش دة خالص لكن نصيحة عموما طالما انت متوتر من موضوع ان الفلوس تكون معاك وانت مسافر استقبل الفلوس علي حسابك البنكي افضل

قدر الله وما شاء فعل .. اكيد ده خير ليك بجد ..
طبعا المفروض طالما انك كنت متوتر كده كنت تروح وتاخد واحد صاحبك معك انا بسافر بفلوس اكتر من كده عادي جدا .. ومبعملش اهتمام عشان كده محدش بيهتم .. اللي فهمته ان الموضوع ده كان من فترة ليه مش حاولت تاني وتالت ورابع ..؟؟؟