السلام عليكم ورحمة الله وبركاته
اللهم صلّ وسلم وبارك على حبيبك خير الخلق أجمعين سيدنا محمد وعلى آله وصحبه وسلم
كتير مننا وخصوصا المبتدئين بنسمع كلمة برايس اكشن او سلوك السعر , واول مره بنسمعها فيها بنبقى نفسنا نفهم معناها لكن مش عارفين او مفيش حد بيشرحها اللي فهما بيفضل يكررها كتير والمبتدأ يسمعها منه ويتقهر اكتر لانه نفسه يفهم معناها وفيه كمان خبراء للاسف مش بيكونوا عارفين يعني ايه سلوك السعر
وده مش يمنع ان هناك عمالقه في البرايس اكشن
قبل مانشرح البرايس اكشن عاوز اقول ان البرايس اكشن بيساعدك تفك طلاسم الشارت وتحلله وهيساعدك في استراتيجيتك هيفلترهالك من الفرص الغير جيده وطبعا مفيش احسن من الفلتر اللي بيعتمد على سلوك السعر او نظرتك للشارت وديما ديما حط قدامك وجهة النظر المختلفه ومش تكون متعصب او متحيز لاتجاهك لان السوق مش هيمشي بمزاجك السوق ليه مزاج واحنا كلنا مجبورين نتمزّج على مزاجه
تعالو نعرف ايه هو البرايس اكشن او سلوك السعر
السعر ليه نوعين من الحركه ولايوجد انواع اخرى
1_الحركه في ترند
2_ الحركه في تصحيح
لكل نوع من انواع الحركه صفاته
اولا : الحركه في ترند بتتوصف انها سريعه وغير متداخله
ثانيا : الحركه في التصحيح بتتوصف انها بطيئه ومتداخله وديما بتيجي بعد الحركه في الترند , والحركه التصحيحيه ليها ميزه انك بتقدر تحصرها بمعنى انها بتكون ليها اشكال
اما تحصرها داخل
قناه او
مثلث او
مستطيل
كده فهمنا ايه هيا صفات الحركه في الترند وايه هيا صفات او سلوك الحركه في التصحيح
الصفات دي او السلوك للحركه بيسمى السلوك السعري او البرايس اكشن
طبعا عايزين نطبق السلوك السعري ده ونستفاد منه في التجاره او في طرقنا وفي ناس بتاجر بالبرايس اكشن فقط
لكل فريم ترند واهم قاعده انك تتاجر مع الترند الاكبر للفريم اللي انت بتاجر عليه مش تتاجر على ترند الفريم نفسه
موضح على شارت الباوند دولار
ازاي كانت الحركه داخل الترند الصاعد من 1.4812 كان السعر كل شويه يصعد ويعمل قمه اعلى من قمه وقاع اعلى من قاع
في اي ترند لما السعر يعمل قاع اعلى من قاع بنقول عليه ترند صاعد واذا كانت القيعان متداخله وهو بيصعد هنفهم ان الصعود ده تصحيح داخل موجه اكبر (لانه زي ماقولت الن الحركه المتداخله من سلوك التصحيح )
الخطوط الخضراء على شارت الباوند بتقولنا ان السعر بيعمل قاع اعلى من قاع والقيعان دي مش متداخله
يبقى احنا في الترند الصاعد ده بننتظر تصحيح وندخل شراء مع الترند ونحط الاستوب بتاعنا تحت اخر قاع صاعده عملها
نيجي مع بعض نشوف اخر حركه من القمه 1.7190 هنجد ان الهبوط منها هبوط سريع وحاد وده من سلوكيات الحركه في ترند_ وكسر اخر قاع صاعده في النرند الصاعد يبقى دي علامه وسلوك بيقولنا ان الترند بدأ يتغير
لانه كسر اخر قاع صاعده في الترند الصاعد بموجه سريعه حاده يبقى على الاقل ان السعر يعمل تصحيح للموجه الصاعده من 1.4812 ويكون لمستويات 50_61.8% عند (1.6000_1.5720)
ليه قولت على الاقل لانه ممكن يكون بداية ترند هابطه ويواصل هبوط لكن انت كتاجر لازم تشوف اقل هدف او اول منطقة بيحصل عندها جني ارباح
تعالو نشوف الهبوط من 1.7190 هنجد ان
السعر بيهبط لكن مصحوب بدايفرجنس
عارفين ايه معنى السعر يفضل يهبط وهو مصحوب بدايفرجنس ده معناه ان السعر بيفضل يهبط لكن بيفقد عزمه في الهبوط يعني السعر يهبط لكن المؤشر بيصعد وده علامه ان الهبوط بيفقد عزمه وانه قرب يدخل في تصحيح ممكن التصحيح ده يكون صغير وممكن يكون معقول لكن احنا ديما بنفترض ان السعر هيصحح الى 50% من اصل الهبوط من 1.7190 وعندها بيكون فيه فرص بيع لانه زي ماقولت ان الهبوط كسر اخر قاع صاعده بموجه حاده سريعه وده دليل على ان الترند اتغير ولو مؤقتا على الاقل 3 موجات هابطه ABC لانه لايوجد تصحيح بموجه واحده , عمرك سمعت تصحيح بموجه A فقط ؟!!
يبقى ببساطه مش تشتري على امل التصحيح وانتظر التصحيح علشان تبيع
حبيت اقدم ولو حاجه بسيطه لعل هناك من يستفيد او انها تنورله الطريق قدام حجات مكنش شايفها
وبالمناسبه علم وتسلسل الموجات ده علم رائع وكبير والتحليل الموجي قبل ماتفكر انك تتعلمه اتعلم سلوك السعر داخل الترند وداخل التصحيح علشان يسهل عليك تتعلم ترقم الشارت ومش تنسى اهم قاعده
لاتحيز او تعصب لاتجاه وكل الاحتمالات لازم تضعها امامك علشان توصل وتكون دقتك عاليه واول الخطوات لتعلم التحليل الموجي (لايوجد تصحيح بموجه واحده على الاقل 3 موجات ABC) لو لقيت في الشارت تصحيح بموجه واحده او هبوط حاد وبعده واصل صعوده اعرف ان الموجه الواحده دي جزء من فلاته ودي اكتر حاجه بتقرف المحلل الموجي ف عيشته وعلشان المساعده تذكر دائما _ انا عارف وقتها هتتنسي _ تذكر انك لاترقم الفلاته عكس الترند لانه حتى لو صحيحه لكن احتمالها ضعيف لانها عكس الترند وانما رقمها مع الترند
بالتوفيق للجميع ان شاء الله