يا سهلا بهاذ القمر عليا طل ****بدر النصفية لكامل في لوصاف
يامحلا ذيك السمايم كي لعسل****نسبتها عربي مأصل من لشراف
مقواه الا كان عقلي راه اشل****من شوفتها يا لخاوة عدت نخاف
هاذي آية في جمال لا يمثل****و دارو عنها محاجية بالتخراف
من شوفتها شحال من قايد ذل****ومن طولتها يروح امتلف تتلاف
ما فيهاش اعيوب شينة ماتتمل****ما تلقى فيها نقيصة لا تقصاف
مربوعة فالقد أخفيفة فالضل****مسبوكة لقداد عريضة في لكتاف
اطولة نخلة ما تتعبر بانخل****دقلة نور اللي موكل للتضياف
في البنة عسلة الذايقها يحصل****عسل النحلة ليمربي في لرياف
يالايمني طارقلبي ليها ونزل****لبا يرجع لي معها دار احلاف
مقواه الا كان جسدي راه اهزل****ما ننسى لمحط مواتي لتصياف
يا سايلني في هواها لا تسأل****لاتهوض لجراح زادوني تضعاف
قالوا ما تعيا امتبعها وتزل**** ساعفنا خليك من هاذ التعياف
قلت لهم مانطيق ننساها بسهل****ما هو رايي راه ذالقلب السياف
حاتمني لرموز صعبة ما تتحل****عييت نطاوع فيه احسبتوعراف
مانقدرش انقول هاذ القلب اهبل****وعاد يهاذي في كلامو بتخلاف
ياخوتي عقلي اتلى عني واسل****لامن جا في نصرتي وعني ناف
يا وخذي شيان حالي واتبهدل****وتقير لوني على ضريفة لخفاف
شعراقرابي كظلمة طاح اسبل****ع جبهة قنديل فوقو دار احقاف
الحاجب و العين مليانة بكحل****و الشنوفة زايدتهم في التسراف
اشفايف و اخدود بنعمان وفل**** المبسم مصموت يحلف فالشواف
الرقبة صاري الما منو طل****طبعوها ذوك السوالف ما تتعاف
صدرك طحطاحة للفارس ينزل****موالف للعودات محنة للتسلاف
قرسولو تفاح للخاوي موكل****و يحاذر روحو خوف من المنداف
الجوف المطوي عندك كتوصل****اسوكى بلاك اتتقر ابلرداف
راحة في المكان بلاك لاطول****اقصب في الزورة خليها تخفاف
المورد معروف فيه الما يجمل****من شربة وحدة يملي بالقراف
يا تمحاني منين يروى يتعدل****ما يتمل شراب ماها ما يتعاف
صانع متمكن فصنعو متماهل****طاعت لوعلوم يحرفها تحراف
عذروني لاكان فوصفي ندقل****هاذالقمرة شوفها محنة و زعاف
من نشوتها في هلاكي متعلل****خلوني في حالتي نا عقلي صاف
هذا حال العاشق ديمة متبهدل****حليلو مسكين راه عندو ماشاف
يا عاقل لاتلوم مسجون مسلسل****بن خيمة كبيرة ناضت فالتضياف
تمت بقلمي medcherif03
يا سهلا بهاذ القمر بقلمي باللهجة الجزائرية
