`·.¸¸.·´♣♣ ورشة بورصات العربية المتحدة ♣♣`·.¸¸.·´

اولا ارجو من الجميع ان يدعوا لمصر وللمصريين ان يخرجنا من هذه الازمة علي خير ان شاء الله وانا في كامل خجلي اني اكتب موضوع في هذا الوضع الراهن بس ان شاء الله فترة وهتعدي .
علي فكرة الاوضاع ان شاء الله في تحسن والقوات المسلحة ارسلت اتوبيسات لنقل الناس من الميادين لمنازلهم وفي استجابة من الناس ويارب احفظ مصرنا الغالية

تحديث للورشة بتاريخ 18/8/2015


اهم نقاط الورشة

الورشة متاحة للجميع مبتدئين وخبراء ويفضل في بداية عمل الورشة استخدام الحسابات التجريبية منعا لأي تقلبات حتي نصل الي درجة من الدهاء الصحي للتعامل مع السوق وانا اقبل النقد والتوجيه والارشاد من اي شخص في المنتدي ولو في اي حاجة غلط بتمني التصحيح من الغير

انا اسمي مصطفي اليمني او اليماني 19 سنة في تانية كلية التجارة من محافظة سوهاج بصعيد مصر .
طبعا اكيد حضراتكم بتسألوا ليه لازمت البيانات دي اكيد انا مش هطلع بطاقة بس علشان احنا هنا اهل مع بعضنا وعلي فكرة الانسان بيتعلم وبيفضل يتعلم طول حياته المهم كفاية كده في النقطة دي نشوف النقطة اللي بعدها .

ان شاء الله احنا هنشتغل باستراتيجية ان شاء الله تكون بسيطة للجميع وكمان هنشتغل علي الاخبار المهمة و مبدأيا هنشتغل علي حساب ديمو وبعد كده نشتغل علي حساب بونص وبعد كده ان شاء الله هيكون شغلنا علي الحقيقي ولو واجهتنا اي معوقات ان شاء الله هنكمل ومش هنعرف طريق اليأس وان شاء الله هنقبل اي تحليلات من اي شخص ونتناقش فيها .

ان شاء الله هنشتغل علي استراتيجية هي مش خاصة بيا للامانة بس انا شوفتها في احدي المنتديات من فترة وجربتها علي حساب ديمو لمدة مش قصيرة وكمان مش طويلة قوي تقريبا في حدود شهرين بس كان دخولي قليل في الصفقات بسبب الدراسة والامتحانات .
احنا هنشتغل مبدأيا بحساب تجريبي بقيمة 500 دولار ، علي فكرة انتوا هتستغربوا ان الحساب التجريبي انا فاتحة بقيمة 500 دولار بس .
انا بحب دايما اني اجرب الحاجة اللي ممكن ابدا بيها بشكل حقيقي
يعني :
معظم الحسابات بتكون بقيمة 10000 دولار طيب هل انا لو فتحت حساب تجريبي بالقيمة دي واشتغل تمام وبعد كده فتحت حساب حقيقي صغير مثلا بـ 500 دولار هيكون ايه الوضع ؟؟
اكيد هيكون في اختلاف .
علي فكرة انا لسه عند رأي ان اللي يقدر يدير حساب بـ 100 دولار هيدير حساب بـ 100000 دولار لان ادارة رأس المال دي فن .
بس طبعا انا بتكلم علي شئ من ملامسة الواقع علشان نقدر نكون في اقرب صورة للواقع طبعا الكلام ده كلة مش مكانة هنا اكيد مكانة في خطة التداول بس الكلام بيجيب بعضه المهم
الاستراتيجية :
هي بتعتمد علي التحليل الكلاسيكي بشكل كبير هنستخدم 3 مؤشرات منهم واحد من وجهة نظري وده اهمهم
اللي هو مؤشر الدعم والمقاومة والترند للسعر
وده وظيفته انه بيرسملك الترندات المتاحة علي الفريم وكمان بيرسم خطوط الدعم والمقاومة للاربع ساعات واليومي والاسبوعي والشهري
مؤشر ab=cd
وده مؤشر بيرسملك شكل الهارمونيك المعروف طبعا ab=cd
مؤشر السوبر سجنل
ده مؤشر مساعد بيديلك اشارات بيع وشراء علي الفريمات
ممكن نستخدم مؤشر من مؤشرات التشبع لفلترة الفرص
وممكن نستخدم اداوت من التحليل الكلاسيكي كمان زي الفيبوناتشي وده هنشوفه في بعض الفرص .
طيب هنشرح طريقة الاستخدام بعد ما خدنا مؤشرات الاستراتيجية :
احنا هنشتغل عامة علي فريم 4 ساعات هنستني ان السعر يواجه اي خط دعم او مقاومة ويفضل انه يكون يومي او أكثر يعني الاربع ساعات مش بستعمله إلا في بعض الحالات اللي هنتكلم عنها بعد كده المهم هنشوف السعر لو الشمعة اغلقت فوق المقاومة بندخل شراء مع بداية الشمعة الجديدة ولو تحت الدعم بندخل بيع وطبعا مع الشمعة الجديدة .
الهدف : في جميع الصفقات الخاصة بالاستراتيجية 25 نقطة.
وقف الخسارة : بيكون تحت خط الدعم السابق بعشرة نقاط وعموما انا مش بشتغل بستوب لوس وبمشي مع الصفقة لغاية لما اشوف لو في بوادر لانعكاس السعر بشكل كبير بتصرف يأما بالهيدج او بالوسائل الاخري او بقفل الصفقة يدوي.
ملاحظات هامة :
هنتكلم عن حالات لاغلاق الشمعات :
مثلا احنا متابعين شمعة الساعة 12 الظهر والشمعة كانت بتواجه مقاومة يومية والحمد لله الشمعة قدرت تكسر المقاومة وقفلت فوق المقاومة
هنا في حالتين
الحالة الاولي :
الشمعة تغلق فوق المقاومة بأكتر من 15 او 20 نقطة يبقي الشمعة الجديدة مش هتبقي بالقوة المطلوبة طيب هنعمل ايه في الحالة دي هنستني لما الشمعة ترجع للمقاومة تاني وتاخد القوة اللازمة واول ما ترجع ندخل معاها (يعني بالبلدي هنستني لما ترجع تاخد زقة وبعد ما تتزق نركب معاها).
الحالة التانية :
الشمعة تغلق فوق المقاومة و كان الفرق بسيط مثلا 10 او 15 نقطة يبقي الشمعة الجديدة مش محتاجة قوة ولا زقة هنركب معاها علي طول وطبعا الكلام مع الدعم ايضا .
طبعا في حالات بتعكس او بمعني اصح بتجلي وده وارد في سوق زي ده بس ان شاء الله هتكون قليلة .
وفي حلات هندخل فيها من غير دعم اليوم ودي طبعا هيكون في اكتر من دليل علي الصفقة مثلا دعم اربع ساعات قوي مع مستوي فيبوناتشي مع ترند يعني هنبقي نشوف الحاجات دي وطبعا دلوقتي

هسيبكم مع شوية صور لبعض الفرص .
اولا شارت توضيحي وعليه المؤشرات




ثانيا بعض الفرص مع التوضيح علي الرسم


-1-

-2-

-3-

-4-

-5-

-6-



وكتير من الفرص ان شاء الله هرفعها في اقرب وقت

اتوجه بالشكر للقائمين علي هذا الصرح العظيم بورصات من اعضاء ومشرفين وعظماء وخاصة احب ان اتوجه بالشكر لكل من ساهم في علمي في هذا المجال ولو بحرف واحد فانا مدين له ليوم الدين.

هنتابع فرص جيدة ان شاء الله وياريت اي استفسار انا موجود تحت امركم