بسم الله الرحمن الرحيم
تقرير بخصوص قرار الفائدة على الدولار الأمريكى - الفيدرالى الأمريكى
- موعد القرار : الساعة 9 مساءا بتوقيت القاهرة +2 جرينتش , الساعة 8 مساءا بتوقيت السعودية ,, يتضمن قرار الفائدة + التوقعات الاقتصادية للجنة الفيدرالية للسوق المفتوحة + تقرير لجنة الفيدرالى [ لجنة السياسات النقدية ]
يصاحب القرار بعد نصف ساعة من إصداره حديث و مؤتمر صحفى للسيدة يلين رئيسة الفيدرالى الأمريكى و ستجيب ايضا على اسئلة الصحفيين فى هذا المؤتمر , يتوقع ان تكون مدة الاعلان الصحفى و المؤتمر ما بين 30 الى 45 دقيقة .
- خطورة و قوة الخبر : [ مدمرة ]
- توقعات الخبر كما فى نشرات الأخبار و المفكرات الاقتصادية : رفع الفائدة بمقدار 0.25%
- نبذ مختصرة عن الخبر :
ببساطة الخبر زى اى خبر فايدة فى العالم , رفع الفايدة على عملة بيزيد من قوتها و تخفيضها بيضعفها , لكن دى مش اى عملة .. دا الدولار الأمريكى .. محرك العالم و عملة الاحتياط فى العالم .. الوضع الاقتصادى الحالى فى أمريكا علشان نكون واقعيين افضل من الوضع فى أزمة 2008 ,, او بمعنى اصح تعافينا من مرحلة السقوط الحر فى 2008 و ازمة الرهن العقارى و قضينا سنوات فى تعافى الى ان بدأ الاقتصاد الأمريكى بالفعل يتحسن مؤخرا (( ليس التحسن الكبير لكنه على اى حال تحسن عن الوضع السابق ))
البنك الفيدرالى قضى حوالى اخر 7 شهور فى عام 2015 فى الكلام عن رفع الفايدة و تأجيل رفعها - تقريبا كان بيكون فيه اجتماع شهرى بيتظل كلمة تأجيل رفع الفايدة الى الشهر القادم كلمة مطروحة دائما فى كل اجتماعات الفيدرالى معادا اجتماع شهر 9 تم القول فيه بوضوح التأجيل الى شهر 10 او شهر 12 و فى اجتماع شهر اكتوبر تم التاكيد على الرفع بنهاية شهر ديسمبر 2015 على ان يكون هذا اول رفع تدريجى للفائدة لسياسة هيتخذها البنك و هى سياسة الرفع التدريجى لمستهدف فايدة 1% على الدولار يعنى 2016 هيكون فيها رفع فايدة ايضا على المدى المتوسط بمقدر 0.25% او اقل كل فترة لحين الوصول الى مستهدف 1% فائدة فى عام 2017 و مستويات تضخم عند 2% و دا مستوى مناسب جدا لوضع الاقتصاد فى أمريكا
الفيدرالى اعتمد بشكل رئيسى على مؤشرات معينة فى اتخذاذ قرار رفع الفايدة من عدمه و مش هنتطرق لشرحهم لانهم هياخدوا مساحة كبيرة جدا من الكتابة لكن بإختصار المؤشرات دى هى ( سوق العمل - مستوى البطالة - مستوى اعانات البطالة - مستويات التضخم - المؤشرات الصناعية )
حاليا الوضع فيها ايجابى [ لكن مش بشكل كبير ]
طيب علشان منضيعش وقت كتير فى كتابة كلام هيحتاج ساعة كتابة على الاقل فى الشرح , احنا محتاجين نعرف ايه او نستفيد ازاى من أخبار بكرة
عندنا 3 سنياريوهات رئيسية مفيش غيرهم
** السيناريو الأول : رفع الفائدة على الدولار :
رفع الفايدة على الدولار بمقدار 0.25% هيكون ايجابى بقوة على الدولار الأمريكى يعنى هتحصل عمليات شراء كبيرة للدولار الأخضر و عمليات بيع لكل ما يقابل الدولار من اى عملة مقابلة له و اى سلعة او معدن مثل الدهب و النفط و خلافه و حتى الأسهم هتهبط بقوة وقتها
خلينا نقول ان ابسط حركة وقت اعلان رفع الفايدة هتكون صعود فى ازواج الدولار مثل الدولار ين و الدولار كندى و الدولار فرنك ما بين 150 الى 200 نقطة على أقل تقدير و هبوط فى الدهب بمقدار 20 الى 40 دولار فى الاونصة من الاسعار وقتها و هبوط النفط ربما الى 32 دولار للبرميل او أقل وصولا الى 30 دولار ,,
طيب فى حالة رفعوا الفايدة بس ب مقدار بسيط يعنى مثلا نقول 0.15% هيكون ايجابى برضو لكنه ايجابى مؤقت و نحط تحت مؤقت دى خطين , يعنى هيحصل ارتفاع قوى وقتها ثم انخفاض قوى ايضا و هيكون النظر الى بيان لجنة السياسات و انتظار حديث يلين لتحديد وجهة الدولار المقبلة , يعنى فى الحالة دى بإختصار هيحصل صعود فى الدولار مش هيكون قوى و الصعود ال هيحصل ممكن يهبطه تانى بعدها ب دقائق .
و على أى حال يجب يجب يجب يجب النظر لبيان الفيدرالى المصاحب للقرار و السماع لتصريحات يلين لانها من سيحدد الوجهة المقبلة للدولار
** السيناريو الثانى :
تثبيت الفايدة على الدولار بمقدار 0.25% على الوضع الحالى 0.25% هيكون له تأثير سلبى جدا للدولار و هيكون الهبوط قوى بمقدار 200 نقطة او أكثر على ازواج الدولار لانه هيكون عكس كل التوقعات و عكس وعود الفيدرالى على مدار شهور + ان الفيدرالى هيفقد مصداقيته و اى حديث عن تأجيل الرفع لاى شهر قادم هيكون غير مصدق و هيكون تأثيره سلبى جدا على الدولار ,, فى الحالة دى هيكون فيه عمليات شراء بقوة لكل ما هو مقابل للدولار زى اليورو دولار و الباوند دولار و الدهب و النفط و الأسهم و وقتها مش هيكون حديث يلين ذو أهمية وقتها لان زى ما قولنا هيفقدوةا مصداقيتهم امام العالم
** السيناريو الثالث :
رفع الفايدة كما هو متوقع بمقدار 0.25% ليصل الى 0.50% + بيان لجنة سياسات ايجابى بمزيد من الرفع فى عام 2016 + لهجة ايجابية من يلين = صعود قوى جدا جدا فى الدولار الأمريكى اعتقد ممكن يصل ل 300 نقطة و أكثر على ازواج الدولار و هبوط ما يقابل الدولار بنفس المقدار
# شوية ملحوظات على هامش التقرير :
- توقعى الشخصى هو السيناريو الأول
- نصيحتى لو معندكش بالفعل مواقع شراء على الدولار الامريكى من أمس ( الثلاثاء ) متحاولش تفتح صفقات جديدة و تزنق نفسك و حاول تمسك نفسك و اعصابك وانت بتتابع الخبر و متتسرعش فى الدخول بناءا على اى تقارير من اى حد , متنساش ان فيه بيان و فيه حديث صحفى غير القرار و مش عارفين اللهجة هتكون dovish ولا Hawksh يعنى هتكون سلبية ولا ايجابية
- قرار اليوم قرار يا تتمرجن منه يا تدبلر منه , دى جملة شفتها كتير اليومين دول و غير صحيحة بالمرة , معلش يعنى مش 200 ولا 400 نقطة حتى هما ال هيمرجنوك لو داخل بإدارة راس مال صح , لكن انا ليه اصلا ادخل حاجة مش عارف هيحصل فيها ايه لما ممكن استنى القرار و البيان و الحديث و ابقى عرفت وجهة الدولار الجاية ل شهرين تلاتة ادام على الأقل
- معظم منصات الميتاتريدر او الشركات هتهنج وقت الخبر و هيحصل اعادة تسعير فا متحاولش تدخل تضارب و تقول هعرف اخرج بسرعة وقت الخبر
- ال بالفعل عنده مراكز كسبانة يا ريت يقفلها او يقفل نصها على مكسب و يحط للنصف التانى ستوبات على نقط الدخول , و ال عنده صفقات خسارنة يا ريت يحصن نفسه و حسابه ب استوبات مناسبة
- الصين و اوروبا ضغطوا على الفيدرالى جدا فى عدم رفع الفايدة الفترة ال فاتت بتدخلات بكل واحد و طريقته فا متستبعدش ابدا ان الفيدرالى يطلع جبان و ميرفعش الفايدة , يعنى متسلمش ودنك لتقارير البنوك و افتكر ان يوم صعود اليورو دولار 400 نقطة كان بنك جولدمان ساكس احسن بنك فى العالم كان متوقع انخفاض 300 نقطة !
- و أخيرا مشاهدة ممتعة ما بين الساعة 9 الى 10 مساء يوم الأربعاء
لامانه الشرح منقول من اخ على الفيس بس قولت تعم الفايده
وكلنا نستفاد وربنا يسترها اليوم على حسابتنا