طريقه Arbitrage القديمة

السلام عليكم ورحمه الله

كان في حد عامل موضوع بيسأل عن الArbitrage وطريقه المتاجرة بيه

بصراحه اترددت كتير اني انزل موضوع عنه ولكن قولت خلينا ننزل موضوع ونشوف الاخوة

بس بدايه

الطريقه غير شرعيه بالمرة وكثير من البروكرز بتحاربها وبتقف ضدها واول ما تشم انك شغال بيها بتوقف الحساب


خلونا نقول ان

الطريقه للتعلم ولتعم الفائدة ليس الا

ايه هو الArbitrage

لو رجعنا لزمان شوية كدا كان التعامل بدون اموال لان مكانش اخترعوا الاموال اصلا

طيب التعامل كان ازاي ؟

التعامل كان بالثمار والحبوب والبيض والفراخ الخ الخ

وكان اغلي حاجة بيتم التعامل بيها حتي اغلي من الدهب هي حبوب الكاكاو اللي بيتعمل منها الشيكولاته

كانت الفرخه ب1000 حبه كاكاو مثلا ولبيضه ب10 كاكاو

والبطيخه ب20 كاكاو والفرخه ب2بطيخه ونص وهكذا

طيب انا في بلدنا عندنا فراخ كتير بس مفيش كاكاو يبقي الفراخ عندنا رخيصه اكيد لوفرتها

وعند بلاد الكاكاو الفراخ غاليه والكاكاو رخيص

طيب لو في بلد جنبنا هايبقي عندها فراخ رخيصه بس مش زي عندنا

وهكذا لو بلد جنب بلاد اللي فيها الكاكاو السعر مش زي عندنا

طيب انا عايز اجيب 1000 كاكاو ؟

يبقي هاروح اشتري من بلد الكاكاو واديلهم فرخه واخد 1000 كاكاو

طيب وانا راجع قابلت واحد من بلد جنب بلاد الكاكاو وخد مني ال1000 كاكاو وعطاني بداله خروف

انا خدت منه الخروف وعطيته ال1000 كاكاو ورجعت بلدي بدلت الخروف ب3 فراخ وروحت بعتهم تاني لبلاد الكاكاو ب3000 كاكاو

كدا حد خسر ؟

كله كسبان حتي اللي باعلي الخروف بال1000 كاكاو

لانه معندهمش كاكاو والكاكاو غالي جدا في بلدهم

انا كسبت وهو كسب ودا كمان ممكن يكون مفكر انه اشتغلني

طيب الكاكاو والفراخ والحجات دي مثال للعملات دلوقتي

لو انا كمواطن مصري عايز اشتري 1000 دولار هاعمل ايه ؟

لازم يكون معايا حوالي 17000 جنيه

طيب انا حضرت 17000 جنيه وروحت اشتريت 1000 دولار وانا راجع في السكه قابلت واحد كويتي قالي محتاج دولارات روحت انا مبدله ال1000 دولار بسعر صرف السوق وهو عطاني 305 مثلا دينار

وانا مروح قابلني واحد مصري رايح بكرة مسافر الكويت وقالي محتاج دنانير كويتي
روحت انا مبدله بسعر السوق عطيته الكويتي وخدت منه المصري حوالي 17300 يعني زيادة عن المبلغ اللي انا طلعت بيه من بتنا

هو دا الArbitrage

معايا 17000 مصري حولتهم ل1000 دولار حولتهم لدنانير كويتي 305 رجعتهم لمصري بقوا 17300 جنيه

دا اللي بيحصل علي المنصه

لو انا اشتريت كذا وبعت كذا وعملت كذا دا هايعمل فجوه بعد تخطي السبريد والناتج الكلي للصفقات هايبقي + يعني جرين

هاعمل نفس المثال علي المنصه هاشتري دولار بمصري واشتري كويتي بدولار واشتري مصري بكويتي

USDEGP بيع
USDKWD بيغ
KWDEGP شراء

17000
1000
305
_____

+300

دي المعادله مهما السعر طلع ولا نزل ولا اتهبد في الحيطه هايفضل الفرق مكسب 300 جنيه ويمكن اكتر كمان لو حسبت السبريد مثلا -15 لكل الصفقات هايبقي 285

طبعا دا مثال بعيد كل البعد عن تحقيقه ولا عمرنا نشوف المدعو جنيه مصري في الفوركس

اعرف بقي

فرق السيوله الخاصه بالبنوك وفرق سرعات مزود الانترنت والداتا الخاص بالبروكر نفسه دا يصب لمصلحه المتاجر

افتح منصتين خاصين بشركتين مختلفين هتلاقي السعر هنا غير هنا علي الاقل بنقطتين لو مكانش 4 او 5 كمان

طيب استفيد ازاي من الموضوع دا ؟

عشان تستفيد من الموضوع دا لازم تتوفر لديك شويه حجات

اولهم انك ميكونش عندك ضمير وبتقبل فلوس حرام

شركة بروكر تحت السلم ويا سلام لو سيئه السمعه

انترنت سريع جدا وسرعه بديهه وشوية ذكاء

وهاتفتح المنصه وتشتغل علي اكثر من عمله مع بعض وهتلاقي العمليه حلاوة

الطريقه دائما + خضراء يعني ولا تري ال- ابدا

مرفق صورة من حساب فتحته لغرض عرض الطريقه عليكم

ولكني اعيذكم بالله من هذه الطريقه لانها حرام شرعا وقانونا وكثير من الشركات ترفضها وانما نزلت الموضوع عشان نتكلم عن المدعوArbitrage ومحاولة مني تبسيطه علي قد ما اقدر

الصور المرفقة

Arbitrage.jpg‏ (261.9 كيلوبايت, المشاهدات 208)

التوقيع

صراحة انا اشوف ان الطريقة ليست حرام ابداً ولكن هل يمكن تطبيقها على شركات محترمة ؟ الاجابة قطعاً لا بسبب الفلاتر

التوقيع

نعم اخي العزيز الطريقه لا تنفع مع معظم الشركات

ولكن موضوع انها ليست حرام فانا اعتقد انها حرام لانها مضمونه الربحيه

وربنا حرم الربا لانه مضمون الربحيه

مجرد وجهه نظر

التوقيع

هو السؤال لماذا بعض البروكر منصته بطيئة ............ وهل البطئ متعمدا لاسباب تضمن له اكبر قدر من الربح ؟؟ّ!!

طبعا ابطاء المنصات في غالبه متعمد .......... لذلك يكون الجزاء من جنس العمل ان تمكنت منه وهو يستحقه والله اعلم

اقتباس:

المشاركة الأصلية كتبت بواسطة only-forex

نعم اخي العزيز الطريقه لا تنفع مع معظم الشركات

ولكن موضوع انها ليست حرام فانا اعتقد انها حرام لانها مضمونه الربحيه

وربنا حرم الربا لانه مضمون الربحيه

مجرد وجهه نظر

على ما اعتقد هذا نظرياً ولكن حدوث خطئ وارد باى لحظة لانة لا ضمان على الاكسكيشون اذن هذا ليس ربا ابدا

التوقيع

بعض البروكرات بطيئه لاسباب فنيه منها الداتا سنتر تختلف من مكان لمكان ومن بروكر لبروكر

يعني اللي عنده داتا سنتر في امريكا او كندا غير اللي عنده داتا سنتر في قبرص

وبسبب الانترنت ايضا

اللي رافع سيرفر علي سرعه 500 جيجا بايت غير اللي رافع علي سرعه انترنت 1 تيرا بايت مثلا

انت لو عندك سرعه 4 ميجا ومشترك معاك اتنين علي نفس الخط لو واحد فيهم فتح يوتيوب السرعه بتأثر عليك مع العلم انك 4 ميجا يعني سريع


مابالك الاف المستخدمين وكل واحد بيسحب داتا كام وهكذا


اما موضوع البطيء المتعمد دا فانا استبعده

لان الشركة عايزة تبقي علي القدر والمستوي العالي لمواكبه المزودين ولو بقت بطيئه يبقي السعر هايتغير عليها كل شوية وهاتبقي ضحيه المستخدم اللي اشتري مثلا من سعر 1000 وبين المزود اللي غير السعر الي 1001 والشركة ملحفتش تغير في المنصه بسبب بطيء الانترنت

التوقيع

يا عزيزي لو كان هناك خطأ وارد ماكانت الشركات حاربت الطريقه

ولو علي الاقل هناك خطأ هايكون كام في الميه يعني 10 في الميه

طيب اشتغل بال90 في الميه

مفيش حتي استراتيجيه مضمونه كدا

التوقيع

السلام عليكم و رحمة الله تعالى و بركاته
على حد علمي الاربيتراج هو استعمال منصتين مختلفيتين و اقتناص الفرص عندما يكون هناك فرق في التسعيرة
مثلا لو كان اليورو في الشركة الاولي 1.1000 و الثانية 1.1003 فانت راح تبيع في الاولي و تشتري في الثانية و تربح نقاط مضمونة و لكن هذا يتطلب اكسبرت سريع حتى يقانص الفرص و هذا هو الذي تحاربه الشركات لانها تعرف عندما تضع الاكسبرت في منصتها
......................
اما الطريقة التي شرحتها فاظن ان البعض يطلق عليها هيدج ثلاثي و هو موجود في مواضيع كثيرة جدااااا ، و اظن ان الاخ ''' محمد علي'' و هو عضو في المنتدى شرحه من قبل (ربما 2010 او 2011)...... و الطريقة تعمل على ثلاثة ازواج
مثلا اليورو/دولار ..................بيع، هنا بيع لليورو و شراء للدولار
الدولار/ين ..........................بيع، هنا بيع للدولار و شراء الين
اليورو/ين.........................شراء، هنا شراء اليور و بيع الين

و كما نلاحظ ان الثلاثة ازواج في هيدج ، و الربح ياتي من سرعة الازواج فهناك زوج يتحرك اكثر من زوج اخر ، و اظن ان هذه الطريقة لا غبار عليها و هي مشروعة للتداول
............ تقبل مروري .. سلام

مرورك شرفني طبعا

الاربيتراج انواع كما قلت اخي العزيز وكما تفضلت وشرحت ولكن انا تكلمت علي شيء انا كنت متخصص به

وانا لو تبحث عن مواضيعي في المنتدي ستجدها بتتكلم عن الهيدج فقط لا غير
ودا يعني اني احبه ولا اشتغل الا بيه

الطريقه هي هيدج ثلاثي فعلا ولكن ليس هيدج بحت


في الهيدج انا ابحث عن عمله تكون هيدج للاخري مثال يورو دولار واليورو باوند والباوند دولار

لكن في الاربتراج انا ابحث عن عملات تكون فيها فجوات سعريه بين سعر تغيرها

الظاهر انك مقرتش حكايه الفرخه والبطيخ والكاكاو

مرورك شرفني

التوقيع

لا و الله قريتها و لكن ربما لم افهمها جيداااا ،