بسم الله الرحمن الرحيم
الدرس الخامس : العزم باستخدام الماكد MACD
( من اهم الدروس اللي استفدت منها شخصيا في الفوركس و اللي هيغير من نظرتك تماما للشارت )
في الدروس السابقة اتكلمت مع حضراتكم عن الترند و قلنا ان اساس التحليل الفني هو المتاجرة مع الترند الحالي
و كان في اسئلة زي كيف تحدد اتجاه الترند و ازاي ندخل مع نهاية التصحيح في اتجاه الترند
و دلوقتي جاء دور السؤال الثالث و اللي يعتبر الاهم من بينهم
هل سيستمر الترند ام سينعكس ؟
- في طرق كتيرة منها اشكال الشموع الانعكاسية في الدرس الاول
- او كسر الترند و الدعوم و المقاومات في الدرس الثاني
- او النماذج السعرية الانعكاسية في الدرس السادس
- و اخيرا باستخدام العزم و يعتبر المؤشر الاهم لانعكاس السعر
ندخل بقى في الدرس بعد المقدمة الطويلة دي
ما هو العزم ؟
العزم هو مقياس لقوة الترند
مثال بسيط
نفترض ان حضرتك بتتفرج في التلفزيون على سباق مسافات طويلة
و بتشاهد متسابق
اول 1000 متر المتسابق خلصهم في 10 دقائق
تاني 1000 متر المتسابق خلصهم في 25 دقيقة
تالت 1000 متر المتسابق خلصهم في ساعة
نفهم ايه من ده ؟ نفهم ببساطة ان المتسابق تعب وانهك و احتمال كبير مش هيقدر يكمل اكتر من 1000 او الفين متر تانيين بالكتير
السعر بالظبط كده و هو ده مفهوم الدايفرجنس
الدايفرجنس معناه ان لو الترند صاعد هتلاقي السعر بيحقق قمم اعلى و لكن على مؤشرات العزم بيحقق قمم اقل ( يعني بيحقق قمم اعلى و لكن بقوة اقل زي المتسابق بيجري و بيقطع مسافات اكتر و لكن كل شويه سرعته بتقل )
و الدايفرجنس هو من اولى اشارات انعكاس الترند
و العكس في الاتجاه الهابط
طيب ماهي مؤشرات العزم ؟ فيه مؤشرات كتيرة مثل الماكد و الاستوكاستك و RSI
بس انا بستخدم الماكد بحس انه اكتر مصداقية
طيب نفترض العكس هو اللي حصل
يعني السعر كون قمم صاعدة جديدة و قمم اعلى ايضا على الماكد
اذن الترند قوي و نتاجر معه في امان ان شاء الله
امثلة حية من الشارت
السعر كون قاع اقل و لكن الماكد كون قاع اعلى يعني الترند ضعيف
انظر ماذا حدث بعدها
مثال اخر
4 فرص في شارت واحد و اخر فرصة هي التي سببت الصعود في الشارت السابق
السعر كان في ترند صاعد . ظهر دايفرجنس على الماكد فهبط السعر
ثم تكون دايفرجنس في الترند الهابط فصعد السعر
و بعد ذلك دايفرجنس ثالث في الترند الصاعد فهبوط
امثلة اخرى
طبعا في فرص هتلاقي الدايفرجنس و تلاقي السعر يتحرك شويه في صالحك و بعدين يعكس
و فرص تانية هتلاقي الترند انعكس من غير دايفرجنس
عشان كده مينفعش نستخدم اداة واحدة و انما مجموعة ادوات للتحليل و انتقاء الفرص
و ايضا ادارة الصفقات من استوب لوس و تريلنج استوب و تحريك استوب للدخول و غيرها و اللي ان شاء الله هتكون في الدروس القادمة
اتمنى اني اكون وفقت في الشرح و اي سؤال او استفسار انا في الخدمة
في امان الله