هنتكلم عن موضوع وهو مهم جدًا جدًا، أحد أكبر مآسي وقصورات التفكير والدماغ البشري، مغالطة منطقة أسمها survivor bias "إنحياز الناجين/الباقين." وأيضًا بخصوص بدء الدراسة وجدوى التعليم والثانوية العامة وكل الأشياء الجميلة دي.
.
• أثناء الحرب العالمية الثانية في أوج الحرب بين ألمانيا وبريطانيا، كانت الطائرات البريطانية بتقع بكميات كبيرة جدًا من المدافع الألمانية المضادة للجو، ولذلك كان لزامًا على البريطانيين وضع المزيد من الدروع الواقية على الطائرات لحمايتها من المدافع، ولكن المشكلة إنهم مينفعش يضعوا الدروع أو التصفيح على جميع أجزاء الطائرات لأنها هتثقل كاهل الطائرة وتكدر قدرتها على الطيران وضرب هدفها بكفاءة عالية ولذلك كان لابد من وضع الدروع على أماكن محددة (الأماكن الأكثر حيوية وتأثيرًا في الطيارة.) المهم قضوا بعض الوقت يدرسوا الطائرات المصابة العائدة الغارات الجوية ويدرسوا المناطق اللي أتضربت فيها الطائرات ويضيفوا لها وقاية ودروع أكتر، تفكير 10 على 10 ومنطقي ولا تشوبه شائبة، مش كدا؟
.
لا طبعًا مش كدا، بل انها فكرة سيئة وغبية للغاية لماذا؟ لأنهم في الدراسة بتاعتهم هنا بينظروا على عينة محددة أو مجموعة فرعية من المجموع الكلي للطائرات وهي مجموعة الباقين أو من أستطاعوا النجاة والعودة لهم ليدرسوهم أصلًا، لكن لو فكرت في الموضوع منطقيـًا وببعض التعمق، هتلاقي إن الإستنتاج الحقيقي والواقعي هو العكس التام لما أستنتجوه هم، وأن التصرف الصحيح هو وضع الدروع للمناطق السليمة في الطائرات للي عادت لهم، لأن اللي أتضربت في الطائرات العائدة لهم تعتبر مناطق ثانوية وغير مؤثرة بدليل أن الطائرات أتضربت فيها وعادت لهم، بينما الأماكن الأكثر حيوية أكيد في المناطق السليمة في الطائرات اللي عادت لهم، ولذلك لما الطائرات الأخرى أتضربت فيها وقعت ولم تعود لهم أصلًا لكي يدرسوها. الإستنتاج السطحي المبدأي اللي هم أستنتجوه، دا اللي ممكن ناس كتير على غير دراية بالsurvivor bias يستنتجوه وبالتالي كما رأيت بيؤدي لقناعات ونتائج كارثية وخائطة تمامًا وبيزيد الطين بلة، وبيقنعك بحل وهمي في الحقيقة مبيعملش حاجة غير إنه يفاقم المشكلة، وأن الحل الحقيقي والصحيح هو عكس ما أستنتجته للوهلة الأولى.
.
• مثال آخر على الsurvivor bias كان في دراسة عام 1987 في نيو يورك على آثار سقوط القطط من الأدوار العالية جدًا (نيو يورك وقطط بالتالي هيكون فيه كمية كبيرة من سقوط القطط من ناطحات سحاب) كان العلماء بيعملوا تحليل لشدة الإصابات بالتناسب مع الإرتفاع اللي سقطت منه القطة، وفي البداية لقوا الموضوع مباشر ومنطقي جدًا، كل ما كان الدور اللي سقطت منه القطة أعلى كل ما كانت الإصابة أشد، (يعني القطة الساقطة من الدور السادس إصابتها أشد من الساقطة من الدور الثالث) ولكن بعدها أكتشفوا شيء عجيب جدًا وهو أن بعد الدور السابع إصابات القطط بتكون أقل، يعني مثلًا القطة أفضل لها تسقط من الدور ال20 عن السقوط من الدور الرابع! طبعًا العلماء حاولوا يلجأوا لجميع أنواع التفاسير وأكثر تفسير شعبية فيهم هو أن القطط بعد الدور السادس بتصل لما يسمى الterminal velocity أو السرعة القصوى لهم (يعني مقاومة الهواء مساوية لوزنهم تمامًا وميقدروش يسرعوا أكتر منها) وفي الحقيقة بعد هذه المرحلة بيبدأوا يبطئوا ووقعتهم ترتخي وبالتالي تكون إصابتهم أخف.
.
طبعًا دا تفسير محتمل، بسفيه عيب قاتل، مش بالضرورة بيجعله تفسير خاطئ ولكن بيجعل التعويل عليه كالتفسير الوحيد والأهم خطأ شنيع، لأ،ك لو فكرت في الsurvivor bias هتكتشف إن في الحقيقة القطط اللي كانت بتسقط من الأدوار اللي فوق السابع في الحقيقة إصابتهم أعلى بمراحل وليس أقل، وفي الحقيقة إصابتهم لم تكن إصابة أصلًا، بل موت! بمعنى أن القطط اللي وقعت في فوق الدور السابع غالبيتهم هيموتوا فوريًا وبالتالي لن يحصلوا على الفرصة لدخول غرف الطوارئ اللي كان العلماء بيجمعوا منها عينات القطط اللي بيدرسوها، وبالتالي منطقي جدًا جدًا إن يكون في هذه الغرف قطط من اللي وقعوا من الدور الأول للسادس أكتر بكتير جدًا من القطط اللي وقعوا من فوق الدور السابع لأن هؤلاء ماتوا أصلًا، ومرة أخرى يكون الsurvivor bias قناعات وإستنتاجات تبدو في ظاهرها منطقية ولكنها في الحقيقة مضللة وخاطئة تمامًا.
.
• نفس الكلام دا ممكن تشوفه مثلًا في الأهرامات أو غيرها من الآثار القديمة حول العالم، لما الناس بتنظر عليها كتير منهم بيطلعوا بإستنتاجات تبدو منطقية بس هي خاطئة تمامًا تمامًا زي إنهم في الماضي كانوا بيبنوا أفضل مننا وعلى علم أحسن مننا بالهندسة وان احنا دلوقتي منعرفش نبني زيهم، إلخ، بينما في الحقيقة انت بتنظر على عينة فرعية ومحدودة جدًا جدًا من مجموع المباني اللي كانت موجودة وقتها، بتنظر على المباني الأفضل بناءًا والأفضل صيانة ورعاية.
نفس الكلام عن لاعبي الكورة، ناس تنظر لنموذج لاعب كرة ناجح وتتحسر إنها معملتش زيه وهكذا، ولكن اللي بيستثنوه ويقصوه من تفكيرهم هو عشرات أو مئات الملايين غيره إللي حاولوا يبقوا في المجال زيه ومنجحوش وأتعصروا في طي النسيان ونازلين free fall في غياهب الجُب. رؤيتك للمحصلة النهائية بعد السنوات منحتك صورة براقة بس مضللة عن الجانب المشرق والمكافآت في الموضوع، بس مشفتش المجازفات الكبيرة الصعوبات وتقلبات الحظ المترافقة معاه.
نفس الكلام عن الناس اللي لما تشوف Steve Jobs وBill Gates وMark Zuckerberg وكدا مكملوش تعليمهم، يستنتجوا إن الفشل في الدراسة حاجة كويسة، وإن التعليم مش مفيد، وبالعكس الإنسان الناجح في حياته بيكون هو الفاشل في التعليم وإن أغلب أنجح الناس في العالم مش متعلمين، إلخ.
.
في الحقيقة بقى لو أدركت إنك في كل الأمور السابقة بتنظر على عينة فرعية ومنتقاة وإستثناءات الإستثناءات ونظرت للصورة الكبيرة وعلى كل البيانات الموضوعية ، هتلاقي إن الواقع العكس التام لما ممكن أن تستنتجه وانت على غير علم بالsurvivor bias أو قصور الدماغ البشري في النظر لهذه الأمور، هتلاقي إن واقعيًا احنا بنعرف نبني أحسن من الفراعنة بكتير جدًا وتقنياتنا متقدمة عنهم بمراحل، وإن الناس المتعلمين والجامعيين في المتوسط، بل في الغالبية العظمى من الأحيان أنجح وأغنى وحياتهم أكثر إزدهارًا بمراحل من اللي لم يكملوا تعليم، دا غير طبعًا إن مفتوح لهم فرص وآفاق أكتر وهكذا، والحاجة اللي لازم تقدرها إن طول ما الشيء معاك انت مش حاسس بأهميته أو قيمته، يعني انت مثلًا متعرفش إحساس العجز والنقص إللي ممكن يشعر بيه الجاهل (حتى لو كان غني) لما يلاقي نفسه مش عارف يتعامل مع أمور بسيطة أو يفهم أشياء نفسه يفهمها بسبب جهله.
.
يعني مثلًا مش عشان انت شفت صاحب مطعم ناجح جدًا جدًا، يبقى لازم كلنا نكون أصحاب مطاعم حتى لو مش هنتعلم أو إنك تبقى صاحب مطعم بشكل ما في كل الأحوال أفضل من انك تكون مهندس أو طبيب أو متعلم في العموم، لأن أول شيء مش بتاخده في الحسبان هو ملايين أصحاب المطاعم غيره إللي مش بنفس نجاحه ولا حتى %1 منه واللي حتى قفلوا، وتاني شيء مش بتقارنه مع أنجح ناس في العينة التانية، يعني مش بتقارنه مثلًا بأصحاب الشركات الهندسية الكبيرة أو الشركات الطبية الكبيرة، بل جايب أفضل أفضل الأفضل من المجموعة الأولى وبتقارنه بمتوسط أو حتى أفشل نماذج وعينات من المجموعة التانية، وغير كدا كتير، ووضعك انت أو وضع 3 - 4 من صحابك أو حتى 100 واحد تعرفهم مش أساس موضوعي ولا مقياس لأي حاجة لما تكون بتعمل تحليل موضوعي أو تقييم متجرد لقضية أو شيء ما (أخرها تكون جزء من المقياس بس مش كله،) بل لابد من النظر على الصورة الكاملة من خلال بيانات مستفيضة وشاملة.
.
قصة Steve Jobs وMark وهكذا ممكن تخرج منها آه بإستنتاجات زي إن مش كل شخص مكملش تعليمه هو بالضرورة فاشل أو مستحيل يعمل حاجة في حياته، أو إن في بعض المجالات ممكن يكون إكمال التعليم مش مؤشر حاسم على نجاحك فيه (زي الإعلام أو التسويق مثلًا، يعني ممكن تلاقي Steve Jobs تسويقيًا أفضل من 100 واحد معاهم دكتوراه في التسويق، لكن على عكس مجال الطب مثلًا إللي لازم له دراسة أكاديمية ومعامل ومنهج وطريق كامل شامل تمشي عليه) أو إن المدارس والجامعات أحيانــًا بتكدر الإبداع وتحد من إنطلاق خيال الإنسان والأفكار اللي عنده وبالتالي لابد من عدم التقيد بالروتين والتقليدي أوي، أو إنك ممكن تكتسب تعليم أفضل من الجامعة بالإعتماد على جهدك الذاتي وتفانيك في الدراسة الذاتية، لكن الحاجة اللي مينفعش تستنتجها منها أبدًا أبدًا أبدًا هي إن الجهل (أو عدم إكمال الدراسة) أفضل بشكل ما من التعليم، أو ان اللي مش جامعي أفضل من الجامعي وهكذا، لأن دا العكس التام للمنطق السليم والتفكير المتعمق وحتى الواقع قياسًا على البيانات، وممكن أيضــًا تستنتج إن Steve Jobs وMark والناس دي هي اللي فشيخة بزيادة، مش إن اللي مش هيكمل تعليمه هيبقى زيهم أو حتى نقطة في محيطهم!!!!
.
حتى Steve نفسه وMark وكل الناس دي دايمًا هتلاقيهم بيقدسوا ويبجلوا التعليم والمتعلمين (سواء أكتسبوا علمهم دا من مؤسسات رسمية أو بمجهود ذاتي، المهم المحصلة النهائية) يعني حتى لو ستيف مسوّق جبار مثلًا، هيعمل المنتج اللي بيسوقه ازاي؟ هيجيب الإلكترونيات والزجاج والألمونيوم ويحطهم مع بعض ازاي ويوصلهم بالإنترنت ويعمل معجزة التليفون والMac، إلخ ازاي من غير مهندسين وخبراء ومتعلمين يعرفو الحاجات دي؟؟ بيتهيألي الأشياء دي مينفعش تجيبها للوجود بالتمنى You can't will 'em into existence, you just can't أو هكذا سمعت أخر مرة يعني، وهكذا، دايمًا هتلاقي المتعلمين أنجح والرغبة فيهم أكبر بكتير جدًا والآفاق والسبل المفتوحة أمامهم أكتر بكتير من غيرهم. بعدين شوف أنجح دول العالم والدول الأكثر مساهمة للحضارة واللي لهم الريادة في كل شيء وبيحسدهم ويغبطهم باقي العالم، مش هتلاقيهم عندهم أكبر عدد مطاعم ولا مقاولين، بل اللي عندهم أكبر كمية علم وفهم وتكامل ومؤازرة ما بين النظري والعملي، والعلم المتعمق والحـِرفة.. وانا مبقترحش هنا إن مثلًا التعليم المصري مفيهوش عيوب ولا إنه حاجة رائعة ولا أي حاجة، بس باقول إنه على عيوبه أفضل برضو بمليون مرة من الجهل ورويتينًا وحياتيًا هيكون مفيد ليك حتى لو عايز تهاجر أو تحسن من وضعك، احنا ممكن نتكلم كتير أوي أوي عن الموضوع دا وجوانبه وتداعياته والإستنتاجات الممكنة منه ولكن أعتقد إن انا مقصدي وغرضي واللي بحاول أوصله أوضح من الشمس بعد كل الكلام السابق.
.
الإختزالية والإخلال الsurvivor bias والإستنباط من الإستثناءات وصورة مرقعة، بدلًا من الصورة الشاملية الكلية حاجة في منتهى الخطورة ومن أقسى الفخاخ اللي ممكن تقع فيها وانت مقدم على قرار مصيري أو وانت بتقيم أو بتوزن options للمستقبل أو لأي حاجة تانية، لأنها بتخليك تنتهي بقناعات وإستنتاجات زائفة بس تبدو لك أنها حقيقية ومنطقية جدًا ودي أسوأ من الجهل بمراحل، لأن الجهل زي الصفحة البيضاء ممكن تنقش عليها الصحيح، يعني ليه أمل، لكن اللي عنده وهم معرفة وثقة زائدة في إستنتاجات وهمية وأشياء في ظاهرها حلول ولكن باطنها شيء مدمر دا ممكن يذهب برجله طواعية للجحيم بإبتسامة ورضا. دمتم سالمين منه هو وباقي المغالطات والقصورات الذهنية.
منقول ...
ياريتك يابني كنت اتعلمت كورة احسن - مقال شيق - إقرأ واستمتع ..
2Likes
