ورشة الهارمونيك (التحليل التوافقي) مع الشرح

بسم الله الرحمن الرحيم
في هذه الورشة سأقدم ان شاء الله شرح لمدرسة التحيليل (الهارموينك) او بالعربية (التداول التوافقي)
الورشة مقدمة لمسابقة شهر ابريل لعام 2018

مميزات التداول باستخدام الهارمونيك
1- كثرة الفرص
2- وضوح الهدف والاستوب
3- نسبة الهدف الي الاستوب علي الاقل 1:2 واحيانا تصل الي 1:6
4- تناسب كافة الازواج ومعظم الفريمات (ابتداءً من الساعة)
5- وجود قوانين ثابتة وواضحة لا خلاف عليها وهي مدرسة يعترف بها الجميع ولها تاريخ جدير بالاحترام
6- سهولة تعلمها

الاداوت المستخدمة في التحليل بالهارمونيك
1- مؤشر فايبو
2- مؤشر الزجزاج ZigZag
كلا المؤشرين يتوافران علي منصة الميتاتريدر وباقي المنصات

اولا نحتاج لضبط اعدادات المؤشرات
مؤشر فايبو
نحتاج لاضافة بعض المستويات المستخدمة في الهارمونيك
اتبع الشرح بالصور




مؤشر الزجزاج



في المشاركة القادمة ان شاء الله سأوضح ما هي نماذج الهارمونيك وكيفية ايجادها

نماذج الهارمونيك
تنحصر نماذج الهارمونيك علي ثلاث اشكال رئيسية
شكل حرف M وهو نموذج يكون الدخول عليه بالشراء

شكل حرف W وهو نموذج يكون الدخول عليه بالبيع

شكل حرف N (للبيع ) أو N معكوس (للشراء)



نماذج الهارموينك الاكثر شهرة والاقوي والمعترف بها
1- نموذج الخفاش Bat
وهو من اشهر النماذج واكثر تكراراً
2- نموذج الكراب Crab
3- نموذج الفراشة Butterfly
4- نموذج الجارتلي Gartley
5- نموذج القرش Shark
من اشهر النماذج واكثرها تكراراً
6- نموذج ABCD
ويعتبر حجر الاساس لكثير من النماذج
7-نموذج 0-5
8- نموذج 123 Drive
9- نموذج الخفاش البديل Alternate Bat
10- نموذج الكراب الممتد Deep Crab

هذه هي العشر نماذج الاقوي والاشهر و شخصيا افضل الا يتم استخدام اي نماذج اخري


نماذج اقل شهر (لا انصح بها )
1- Cypher
2- Nen Star
3- Alternate Crab/ Butterfly/Gartley

الصورة القادمة بها كافة النماذج مع توضيح النسب المستخدمة ... هذه الصورة ستكون رفيقتنا طوال رحلة الشرح
(شكرا Cowboy صاحب الصورة الاصلية)

قواعد عامة :

1- ترقيم النماذج

يتم ترقيم نموذج ABCD بالنمط التالي
A-B-C-D


يتم ترقيم باقي النماذج بالنمط XABCD


من الضروري فهم مسألة الترقيم لانها ستستخدم في الشرح

2- رسم الفايبو

يعتمد الهارمونيك علي الموجات ولذا من الضروري فهم كيف يتم رسم اداة الفايبو علي لموجة
لرسم فايبو علي موجة صاعدة ... نمشي مع اتجاه الموجة ... اي نرسم من القاع الي القمة


لرسم فايبو علي موجة هابطة ... نمشي مع اتجاه الموجة ... اي نرسم من القمة الي القاع




كل هدفنا في اي نموذج الهارمونيك هو ايجاد النقطة D لانها نقطة الدخول والمتاجرة

نموذج الخفاش Bat Pattern
يعتبر من اقوي الماذج واكثرها تكراراً علي الشارت
يرجع قوة النموذج الي توافق منطقة الانعكاس المحتملة مع منطقة عرض او طلب

انا هشرح قواعدة الهارمونيك ببتطبيقها علي نموذج الخفاش و بعدها هتكون الدنيا سهلة و هيبقي باقي النماذج سهلة لاننا شرح الاساسيات

نسب نموذج الخفاش


شرح النسب
نموذج الخفاش يشترط ان
1- النقطة B تصحح من الضلع XA نسبة 38 او 50
(اقل من مستوي 38 مرفوض / اكثر من مستوي 50 مرفوض ... يعني لو وصل 61.8 لا يعتبر خفاش ... انما تحت مستوي 50 لكن لم يصل لمستوي 61.8 .. تعتبر النسبة 50 )

2- النقطة C تصحح من الضلع AB نسبة 38.2 أو 50 أو 61.8 أو 78.6 أو 88.6

3- يتوقع ان تكون النقطة D عند مستوي 88.6 من الضلع XA

4- يتوقع ان تكون النقطة D عند مستوي 161.8 أو 200 أو 261.8 من الضلع BC

دا الكلام النظري و ممكن يكون الكلام مبهم دلوقتي لانه نظري لكن كل حاجة هتتشرح حالاً

نبدأ الشرح بسم الله

لايجاد نموذج خفاش فهو بيكون علي شكل حرف M أو W
نفرض اننا لاقينا شكل حرف M زي ما في الصورة اهه


كل هدفنا في اي نموذج الهارمونيك هو ايجاد النقطة D لانها نقطة الدخول والمتاجرة

أول حاجة لازم نشوف هل دا نموذج هامونيك خفاش صحيح ام لا
ازاي ؟؟ باننا نشوف النسب اللي في الجدول صحيحة ام لا
يعني هنشوف نسبة B من XA زي ما هي في الجدول ام لا ؟
ونسبة C من AB زي ما في الجدول ام لا ؟
ثم بعدها هنتنبأ بالنقطة D و هي دي نقطة الدخول وهنشرحها فيما بعد

أولا :
النقطة B من الضلع XA
من المفترض ان النقطةB تحقق تصحيح قدره 38.2 أو 50 من الضلع XA
اقل من 38.2 مرفوض (ولو بكام نقطة ... مرفوض )
اكثر من 50 (يعني 61.8 مرفوض ) مرفوض



رسمنا فايبو علي الضلع XA زي ما شرحت قبل كده
وطلع فعلا ان B مصححة من XA مقدار 50 فايبو
يبقي احتمال كبير يكون عندنا نموذج خفاش
لكن فاضل نسبة كمان علشان نتأكد ان دا خفاش فعلا
هي نسبة C من AB
نرسم كده ونشوف


طلع ان ال C محقق من XA مقدار 88.6
يبقي كده مبروك فيه خفاش فعلا

فاضل ايه بقي .... اهم حاجة ... اننا نتنبأ بالنقطة D (عايزين نشتغل )
النقطة D بنحددها بالرسم علي ضلعين
اول حاجة بنرسم علي الضلع XA و نحدد نسبة معينة وبنسميها النسبة الرئيسية
ونرجع نرسم علي الضلع BC ونحدد نسبة معينة وبنسميها النسبة الفرعية

احنا بندخل لما السعر يوصل للنسبة الرئيسية
واستوبنا اسفل النسبة الفرعية ( الاستوب في الهارمونيك هو اغلاق شمعة من نفس الفريم اسفل او اعلي النسبة الفرعية ... الاستوبات الرقمية لا تصلح مع الهارمونيك )

لو كسر النسبة الفرعية باغلاق اسفله من نفس فريم الرسم ... يبقي النموذج فشل

نرجع لموضوعنا

عايزين نحدد النقطة D
هنرسم فايبو علي الضلع XA
ونحدد مستوي 88.6 ( زي ما موضح في الجدول )



كده احنا حددنا النقطة D عند السعر 1.6853 ( السعر اللي هندخل من عنده )

فاضل نحدد النسبة الفرعية

نرسم فايبو علي الضلع BC و نحدد المستويات اللي موضحة في الجدول
وناخد اقرب نسبة من النسب الفرعية الموجودة اسفل النسبة الرئيسية



النسبة الفرعية طلعت عند سعر 1.6799

يبقي احنا كده عندنا منطقة بين السعر 1.6853 و السعر 1.6799
المنطقة دي تسمي منطقة الانعكاس المحتملة Potential Reversal Zone (PRZ(




هنتداول ازاي بقي :
نضع امر معلق شراء عند السعر 1.6853
الاستوب : اغلاق شمعة 4 ساعات اسفل السعر 1.6799


الاهداف :
نرسم فايبو علي الضلع CD
ونحدد مستويات فايبو 23 و 38 و 50 و 78.6 وهكذا
الاسعار عند المستويات دي هتكون هيا الاهداف
طيب هحدد اي مستوي علشان اخد الارباح واقفل الصفقة
لو الصفقة عكس اتجاه الزوج العام يبقي خليك مع مستوي 23 و 38
لو الصفقة مع اتجاه الزوج العام يبقي خلي اهدافك بعيدة يعني مثلا 50 او 78.6
حسب رؤيتك الفنية للزوج

تعالوا نطبق اللي قلناه


ملحوظة مهمة بالنسبة للارباح :

لما يوصل لمستوي 23 هننقل الاستوب علي الدخول
ولما يوصل لمستوي 38 هنقفل نصف العقد
دا لو هدفنا ابعد من 38
لو هدفنا 38 هنقفل الصفقة كلها
يبقي كده احنا استخرجنا كل حاجة مطلوبة

يبقي ملخص اللي قلناه
فايبو علي الضلع XA
فايبو علي الضلع AB
أتأكدنا انه خفاش
فايبو علي الضلع XA وناخد النسبة 88.6 وهي دل نقطة الدخول
فايبو علي الضلع BC وناخد المستوي اللي تحت مستوي الدخول و هو دا الاستوب (اغلاق)

دا فيديو صغير 3 دقائق(من غير صوت لاسباب فنية)
بيوضح ازاي رسمت النموذج
النموذج ممكن يترسم في دقيقة واحدة
الموضوع بسيط جدا
احنا طولنا في الرشح وممكن تحس الموضوع بياخد وقت لكن فعلا النموذج ممكن يترسم في دقيقة
زي ما هتشوف في الفيديو رسمته وشرحت في 3 قايق
[عذراً, فقط الأعضاء يمكنهم مشاهدة الروابط ]



والتوصية هتكون بالشكل دا ان شاء الله
EurNzd
Buy Limit : 1.685449
Stop Loss : Closure of H4 Candle below 1.680224
Tp1: 1.692269
Tp2 :1.696422
Tp3: 1.699625

السلام عليكم
شرحنا المرة اللي فاتت نموذج الخفاش BAT
واظن كان الموضوع واضح وسهل
معانا مثال تاني للخفاش وهتكون توصية في اخر المشاركة ان شاء الله
معانا زوج NZD-JPY فريم الاربع ساعات
واحنا بنلف علي الازواج لقينا شكل حرف W




واحنا قلنا لما نلاقي حرف W او حاجة نفكر فيها هيا الخفاش
تعالوا نشوف بقي فيه خفاش فعلا ولا لأ !
نشوف اول نسبة وهيا نسبة النقطة B من الضلع XA
المفروض تطلع كام ؟؟
المفروض تطلع 38.2 أو 50 فايبو
تعالوا نشوف كده


تمام طلع ان النقطة B محققة من الضلع XA مقدار 50 فايبو
*** احب اوضح نقطة مهم ... احنا بنعترف بالذيول في الهارمونيك ... يعني لو الذيل لمس نسبة 50 فايبو يبقي هنعتمد نسبة 50 )

اول خطوة طلعت تمام
نشوف تاني نسبة وهيا النقطة C من الضلع AB
المفروض تطلع كام ؟؟
38.2 او 50 او 61.8 او 78.6 او 88.6

تعالوا نشوف هيتحقق دا ولا ايه


طلعت 61.8 يبقي هيا كمان تمام
يبقي احنا كده خلاص اتأكدنا ان معانا نموذج خفاش
نيجي للمهم بقي نحدد النقطة D (نقطة الدخول)

هنحددها ازاي ؟
نرسم فايبو علي الضلع XA ونحدد مستوي 88.6 فايبو (زي ما موضح في جدول النسب )
ودي النسبة الرئيسية



حددنا النسبة الرئيسية 88.6
وطلعت عند سعر 78.269 (وهو دا سعر الدخول)

نحدد بقي النسبة الفرعية
نرسم فايبو علي الضلع BC ونحدد مستوي من المستويات اللي في الجدول (161.8 أو 200 أو 216.8 )
نحدد اقرب مستوي للنسبة الرئيسية


طلعت النسبة الفرعية عند مستوي 224 فايبو ... عند سعر 78.420
يبقي منطقة الانعكاس المحتملة بين السعر 78.269 و 78.420
يبقي هندخل عند 78.269 واستوبنا اغلاق 4 ساعات اعلي 78.420


بس عايز اوضح حاجة بخصوص الاستوب
الاحسن اننا نكبر الاستوب شوية ونخليه اعلي منطقة العرض الموجودة (او اعلي القمة الموجودة ) للامان علشان الصفقة متضربش استوب وترجع تنزل
فهيكون كده


نحدد الاهداف باننا نرسم علي الضلع CD ونحدد المستويات زي ما شرحنا


وبكده التوصية هتكون بالشكل دا
NZD-JPY
SELL Limit :
78.254792
Stop loss :
closure H4 candle above 78.581509
TP1: 77.777283
TP2 : 77.456849
TP3 : 77.199245

أي استفسار مرحب بيه

السلام عليكم ورحمة الله وبركاته
معانا انهارده نموذج الجارتلي Gartley Pattern
هو نموذج قوي جدا زي ما هنشوف دلوقتي لكنه اقل ظهوراً من الخفاش



فتحنا الشارت لقينا حرف ال W منور قدامنا

( هنضطر نستخدم نموذج تم تحققه لاني ملقتش جارتلي متاح للدخول حالياً )

نرسم فايبو علي الضلع XA (او تفكيرنا هيكون في انه خفاش)
لقينا ان النقطة B عند 61.8 ..... اذاً هو مش خفاش ..... نفكر في الجارتلي بقي



نتأكد من النسبة الثانية
نرسم فايبو علي الضلع AB ونشوف النقطة C عند كام
(المفروض النقطة C تساوي 38.2 أو 50 أو 61.8 أو 78.6 أو 88.6 زي ما هو موضح في الجدول )
تعالوا نشوف كده



طلعت 61.8 ...... يبقي احنا كده معانا نموذج جارتلي اكيد

نحدد بقي النقطة D
زي كل مرة بالضبط
هنرسم علي الضلع XA مرة وعلي الضلع BC مرة
الجدول بيقول ان النقطة D من الضلع XA عند 78.6 (النسبة الرئيسية)
تعالوا نرسم علي الضلع XA ونشوف كده


حددنا مستوي 78.6 عند السعر 0.7311
يبقي هندخل عند السعر 0.7311

نحدد بقي النسبة الفرعية
نرسم علي الضلع BC و نختار اقرب نسبة فرعية للنسبة الرئيسية
الجدول بيقول ان لنسبة الفرعية اما 127 أو 161.8


طلع ان اقرب نسبة للنسبة الرئيسية هي نسبة 127 عند السعر 0.7334
(ملناش دعوة بنسبة 113 لانها مش من نسب الجارتلي ....نلتزم بانسبة اللي في جدول الجارتلي )

يبقي كده الاستوب اغلاق شمعة اربع ساعات فوق السعر 0.7334

ويبقي كده منطقة الانعكاس المحتملة PRZ بين 0.7311 و 0.7334



فاضل نحدد الاهداف بقي
هنرسم فايبو علي الضلع CD وناخد مستويات فايبو زي ما شرحنا قبل كده


كده انتهي شرح نموذج الجارتلي
وزي ما احنا شايفين الحمد لله السعر احترم النموذج وهبط من عنده 50 نقطة وان شاء الله يهبط اكتر
اتمني الشرح يكون واضح
اي استفسار مرحب بيه

السلام عليكم
اخي صاحب الورشه برجاء عمل حصر اسبوعي لعدد النقاط المحققه حسب الفرص التي تم عرضها بشكل مستمر - حيث عرض النتائج بشكل اسبوعي شرط هام من شروط المسابقه وتقييم الورشه ..
تحياتي

التوقيع

يعطيكم العافية
لو تكرمت في معادلات لنموذج ABCD لي برنامح سواء الميتاستوك او التكرتشات او للايمي بروكر

شكرا للشرح و اتمني اضافة بقية النماذج