بلا شك الواحد يتأثر باللي حوله من احداث واشياء وبشكل ملحوظ والانسان المتوازن يتأثر ويؤثر< يعني مايجيك واحد مايدري شالدنيا يمشي ويقلد ولايأثر ع اللي حوله بس يتأثر يعني بالعربي ( إمعه ) ومن طبيعة الانسان التكيف والتماشي مع اللي حوله صح ممكن يقلدهم بس باشياء بسيطه عشان يقدر يتأقلم معهم , والطفل اكثر تأثر من الانسان الراشد وهو يقلد لان معلوماته وخبرته بالحياه توها على قده واذا كبر يصير اقل تأثر وتقليد واكثر تأثير واستقلاليه
والتقليد بالمعنى المرضي :
التأثر الشديد بالآخرين وتقليدهم بالملبس والشكل والهيئه وطريقة الكلام والمسكن والمشتريات وما الى ذلك. ومثل يعني تجيك وحده تقلد شخصية مشهوره وتشوفينها تبذل قصار جهدها عشان تصير تشبه هالفنانه والا الممثله بدون ماتوصل للمضمون الايجابي لانها تفقده اصلا يعني تقلد الاستايل والهيئه والا من داخل مالها دخل فيها وهي تحسب نفسها بهالحاله وصلت لمنزلة الشهره والنجاح و بكذا ضيعت الجوهر والمضمون وهذا اللي بيخلي معاناتها مستمره لانها هي نفسها مو راضيه ولامقتنعه لان المسأله كلها تقليد وتصنع لشخصيه مو شخصيتها. وعادتًا يقلد الضعيف القوي .. ويتأثر به زي تقليد الصغير للكبير . تدرون ليه ؟؟! لانه يحس بنقص وضعف ويتمنى انه يتخلص من ضعفه ونقصه من خلال التقليد وبكذا هو يكون حقق له رضاء وإطمئنان مؤقت للأسف
طيب نجي لانواع التقليد :
* تقليد مذموم :
وهو التقليد اللي اذا سويته ممكن يخرجك من المله لا سمح الله .. طيب بتقولون شلون ؟ بنطرح امثله عليهم مثلًا : التشبه بالكفار ونصت عليه احاديث منها " يقول الرسول - صلى الله عليه وسلم -: (لتتبعنَّ سنن من كان قبلكم حذو القذة بالقذة، حتى لو دخلوا جحر ضب لدخلتموه، قالوا : يا رسول الله! اليهود والنصارى؟ قال : فمن!)" والواجب على المسلم يبتعد عن هذا النوع من التقليد ونتذكر " من تشبه بقوم فهو منهم " وللاسف الحين اللي نشوفه بعضهم لاراح برى سوا لسياحه والا دراسه جاك وجايب معه عادتهم زيهم مثلا يربي له كلب !! وتربيت الكلب شي عارفينه من صغرنا وهو حرام او يلبس سلاسل صليب !! او يحتفل بااعيادهم من كريسمس وراس السنه وما الى ذلك واحيانًا توصل الى افعال بوذيه , فما ادري هالفئه ذي وش يفكرون؟هل يحسبونه تميز ؟ والا ايش بالضبط ؟ الله يهديهم ولايبلانا
* تقليد ممدوح :
وهو التقليد اللي يشرح و يوسع الصدر مثل تقليد رجال علم , عشان يكون شخص بارز وله مكانه بالمجتمع وتقليده يكون له فايده والحمدلله حنا الحين نشوف ناس كثير من هالنوع وبعض الامثله عليهم :
ماشاء الله عليهم الله يهنيهم ..
* تقليد لاهو ممدوح ولامذموم :
وهو التقليد الاكثر شهره بين الاشخاص بعضهم لبعض وهذا النوع نشوفه كثيييييييييييير كثير ودارج بقوة ووصل لدرجه مو حلوه ابدًا ابدًا يعني خلاص ما عاد اشوف احد مستقل بشخصيته كلها شخصيات مقلده للاسف من اسلوب وتصرفات وطريقة كلام وتشوفها تقلد وحده من قريباتها بأشياء ماتصلح لها وهي مو قادره على تقليدها اصلا بس تقلد اهم شي تكون مثلها يعني ممكن تكلف على اهلها في سبيل الحصول على هذا الشي عشان بس تصير زيها وممكن يكون الشي اللي مشتريته ماتعرف له اصلا بش عشان تصير زيها , وزي مانشوف الحين بالفتره الاخيره كل الشعب صارو مصورين واتوقع الشغله تقليد مو قصة هوايه ولا شي , وحتى الفنانات الحين صارو يقلدون بعض بطرقيه عجيبه
نموذج لفناانات عربيات
نموذج لفنانات غربيات ويقلدون طبق الاصل بعد , ليه راحت الاذواق يعني والا كيف ؟! والمحلات صارو يقلدون بعض بنفس الاسماء اللهم فرق حرف والا حرفين ونفس البضايع , وتقليد الماركات اللي هبو فيه يعني اذا انتي ماتقدرين تشترين اصل ليش تشترين تقليد ؟! ترى موب شرط تلبسين ماركه وتطلع حلوه المسأله مسألة ذوق , شفتي الفلوس اللي حطيتيها على التقليد !اشتري لك فيها اصلي اصرف لك , والحلويات القديمه اللي للاسف صرنا مانحصلها ولا نلقها لكثرة تقليدها والجديده بعد ماخلوها بحالها , وامثلتها :
وكثير اشياء طلعت بالفتره الاخيره لاحصر لها حتى الشي ماصار له طعم من كثر ماصارو يقلدون امنيتي اشوف شخصيات مستقله بدون تقليد
كاكتيرات عن التقليد
نجي الحين للأسئله ..
1\ عادي تشترون اشياء تقليد ماركه ؟؟ 2\ قد مره جامع\ه لك فلوس وحاطين في بالكم انكم تشترون هذاك الشي اللي عليه القيمه عشانه اصلي ويوم شريتوه تفاجأتوا انه تقليد ؟؟ 3\عطوني مواقفكم عن التقليد ..احد قلدك او انتم قلدتوا احد ..
آخيرا آتوقع ان التقليد عمومًا شي نفسي ولا يقلد زي ماقلنا الا اللي فيه نقص وضعف بالشخصيه , ماطرحت الموضوع الا لاني شفت هالظاهره انتشرت بشكل كبير وملحوظ اتمنى ان الموضوع يحوز على رضاكم واعجابكم
التعديل الأخير تم بواسطة خادم القرآن ; 29 - 01 - 2012 الساعة 03:30 PM
لا تكن نسخة من أحد لا تكن ظلا لأحد كن أنت نفسك
