الليل موحش

الليل موحش والهواجيـس مـرّه
والشّوق من جمر الجفا شب ناره

النّفس ضاقت والرّجا مات حـرّه
والرّوح عادت للوهـم وانتظـاره

يا ليل تكفى ضمّنـي ألـف مـرّه
واحضن صدى صوتي ورد اعتباره

يا ليل حالـي جـرّه الهـم جـرّه
يا ليل عمري ما يطيق احتضـاره

إن زاد شوقي يفضح الدّمع سـرّه
وان جف دمعي يطلب الشّوق ثاره

العين يكفيهـا مـن الشّـوف ذرّه
والرّوح تروى بالظمـا للبشـاره

يا ليل عمري ما عرفـت المسـرّه
ما عاد لي غير الأسى والمـراره

بعض الغلا دربه عذاب ومضـرّه
فيه الرّجا يرثـي لحـال انهيـاره

بعض الغلا حلـم الليالـي يغـرّه
بعض الغلا تصفق يمينه يسـاره

بعض الغلا لو زاد يكفيـك شـرّه
برد وجفا ليـل العليـل ونهـاره

بعض الغلا نفسـه مكـرّه مفـرّه
ما يرتوي من يرتمي في مسـاره

بعض الغلا نفسه عزيـزه وحـرّه
في خافق مـا ينحنـي للخسـاره

يا مبتلي همّك عن النّـاس صـرّه
عاف الغلا وانفض بقايـا غبـاره

يا متعبي درب الهـوى لا تمـرّه
واسدل على رعشة ضلوعك ستاره

يا منتهي زيـد العتـاب وتشـرّه
شرهة صويب زلـزل الهـم داره