الفوركس VS المجتمع

السلام عليكم

انا واقع فى مشكله غريبه و عجيبه و مش عارف اتصرف ازاى و ارجو لو حد من حضراتكم مر بها يقول لى تعامل معها ازاى

بالمناسبه بلاش اسمع فى الردود كلام سخيف زى بيسوق لنفسه و ادارة حسابات و الكلام الفارغ لانه مش حقيقى و مالوش علاقه بالموضوع

انا شاب اقتربت من 29 سنه اتعرفت على الفوركس من مده كبيره و الحمد لله اتعلمت و طورت نفسى و بقيت بحقق دخل ثابت تقريبا ما بين 7 الى 9 الاف جنيه فى الشهر - طبعا بالدولار مش مبلغ كبير لكن بالجنيه فى مصر مبلغ محترم - و الحمد لله انا ماشى على النسبه دى من عاميين تقريبا . و الحمد لله كنت فى غايه السعادة و الفخر باللى انا حققته .

منذ فتره قليله بدا اهلى يطلبوا منى اننا لازم اتجوز و ادور على بنت الحلال . هنا ظهرت المشكله . اوضاعى الماديه الحمد لله مقبوله و دخلى الشهرى محترم . بس السؤال الرهيب اللى اتسالته فى كل بيت هو انا بشتغل ايه . اقسم بالله انا عمرى ما تخيلت ان الموضوع بالصعوبه دى

احاول اشرح مهما اشرح محدش فاهم حاجه و انا مش عارف اوصل المعلومه لاهل البنت اللى انا رايح اطلب ايدها . كلهم بيتعاملوا معى على اننا عاطل او تافه او تاجر عمله ( بالشكل الغير قانونى ).

و سمعت اقاويل غريبه واحد يقول لى لو امريكا قفلت النت هتعمل ايه ساعتها . و اللى يقول لى يعنى انت هتعد فى البيت مش هتروح فى اى مكان و هو ده اسمه شغل . و كلام من ده .

الاغرب اصحابى اللى هما المفروض شباب و فاهميين التقدم العلمى و التكنولوجيا لقيتهم بيقولوا نفس الكلام .

فجأة و على عكس ما كنت متخيل لقيت الكل بيفكر فى و بيتعامل معى على انى عاطل او انسان تافه لا اصلح لاى شىء .

اما قلت لهم بس انا بكسب فلوس كان الرد عادى جدا ما تاجر المخدرات بيكسب اكتر منك .

اعمل ايه اسيب شغلى فى الفوركس اللى بحبه و بكسب منه و انزل اشوف شغلانه ب 1500 و لا 2000 جنيه فى اى مصنع او شركه و اشوف القرف و شغل 12 ساعه مره تانيه و لا اعمل ايه بجد مش عارف .

جبت شقة وعربية ومستواك واضح انه اتحسن ؟
لو ده حصل مافيش حد هينتقدك بالعكس اصحابك هيقولولك شوفلنا شغل معاك



اما ان يكون وضعك شكله كوضع اى شخص تانى نعم سينتقدوك لان للاسف الناس ليها المظاهر
لازم تلبس وتروح وتيجى ادامهم

والواضح رغم ان دخلك كويس بالنسبة لك الا ان مستواك ظاهر عادى كمستوى الناس اللى حوليك

وبالتالى انت بالنسبلهم شخص عاطل حتى لو بيدخلك فلوس (لكن اشترى عربية بنصف مليون جنيه) وشوف نظرتهم ليك هتبقى ايه


اذا ظهر عليك الثراء (اتحداك ان ينتقدك اى شخص)

وزى ماقلتلهم هيشوفوا انت بتعمل ايه ويحاولوا يقلدوك



(اسف لو الجملة اللى حقولها دى هتزعل حد ) كلامى غير قابل للنقد لان ده سلوك البشر ودى الحقيقة والواقع

التوقيع

اقتباس:

المشاركة الأصلية كتبت بواسطة Northstar

الاغرب اصحابى اللى هما المفروض شباب و فاهميين التقدم العلمى و التكنولوجيا لقيتهم بيقولوا نفس الكلام .

عايزك تغمض عينك وتتخيل الاتى

بتتصل بصحابك وتقولهم تعالوا نخرج النهاردة

وعديت عليهم بعربية BMW ولابس ساعة رولكس وعازمهم فى مطعم جامد

سؤال لحضرتك تتخيل حد فيهم حيقولك ياعاطل او ياتافه ؟
هترك لك الاجابة

التوقيع

شكرا على اهتمامك يا استاذ احمد . لو من ناحية الماديات فانا عندى شقه و جهزتها على مستوى عالى و الحمد لله .

انا بشتغل بادارة راس مال و حاليا بكون حساب برصيد اكبر عشان افتح صفقات بلوتات اكبر و المفروض ان شاء الله ان ده هيحقق ربح اكبر .

بس انا لا اقصد النقطه دى بالتحديد .

ليه لا يتعامل معى الناس على انى شخص بيعمل و بيحقق دخل معين كصاحب اى عمل حر - يعنى هل مثلا السمسار هل له مواعيد عمل ثابته و فى نظر الناس شغلانه و معروفه

هل انا لو سبت الفوركس و نزلت اشتغلت اى شغلانه ب 2000 و لا 2500 جنيه كده الناس هتفرح و هتبقى مبسوطه و لا المفروض اهل اللى انا عايز اتجوزها يفكروا ايه الافضل لابنتهم

اقتباس:

المشاركة الأصلية كتبت بواسطة Northstar

شكرا على اهتمامك يا استاذ احمد . لو من ناحية الماديات فانا عندى شقه و جهزتها على مستوى عالى و الحمد لله .

انا بشتغل بادارة راس مال و حاليا بكون حساب برصيد اكبر عشان افتح صفقات بلوتات اكبر و المفروض ان شاء الله ان ده هيحقق ربح اكبر .

بس انا لا اقصد النقطه دى بالتحديد .

ليه لا يتعامل معى الناس على انى شخص بيعمل و بيحقق دخل معين كصاحب اى عمل حر - يعنى هل مثلا السمسار هل له مواعيد عمل ثابته و فى نظر الناس شغلانه و معروفه

هل انا لو سبت الفوركس و نزلت اشتغلت اى شغلانه ب 2000 و لا 2500 جنيه كده الناس هتفرح و هتبقى مبسوطه و لا المفروض اهل اللى انا عايز اتجوزها يفكروا ايه الافضل لابنتهم

كل الماديات اللى ذكرتها دى عند اغلب الناس يعنى مافيش فرق بينك وبين اغلب من حولك

بالعكس هم يتميزون عنك انهم بيروحوا الشغل وانت قاعد فى بيتك


اجابة سؤالك (ليه الناس بتتعامل معاك كده)

انا ذكرت الاجابة فوق بس واضح انى ماعرفتش اوضح كويس



الناس بتتعامل معاك كده لانك انسان غير مميز (مافيش حاجة تميزك عن غيرك)

حضرتك شغال من البيت ودخلك الشهرى 9000 صديقك شغال فى مكان ما ودخلة 4000
انت وهو بتركبوا المكروباص وبتلبسوا زى بعض وحياتكم متشابهة

هنا الناس لازم تعاملك بطريقة مختلفة عنه (لان عاداتنا وتقالدنا بتقول الراجل لازم يروح الشغل)
يلبس وينزل من بيته ويروح ويجى ادام الناس (رايح الشغل وجى من الشغل) ده كده راجل تمام



ودى اجابة سؤالك (لو انت انسان متميز وده واضح عليك ) معاملة الناس هتختلف تماما



حضرتك بقى عايز اجابة تانيه (ان الناس رجعية و جاهلة بالتكنولوجيا وعادات متخلفة وغيرها)

كل هذه الاجابات لن تغير من حياتك شىء ولن تفيدك بشى



باختصار

يجب ان تجبر الناس على تغير نظرتهم لك ولن يحدث ذلك الا اذا شعروا انك افضل منهم



واسف على الاطالة بس هى دى اجابة سؤالك



بالتوفيق

التوقيع

الأمر بسيط أخى الكريم

أنا تعرضت لنفس الموقف

تعمل ايه ؟؟؟؟؟؟؟؟؟

افتح اى مشروع له علاقة بالنت

مثلا سايبر

وهات حد يشتغل معاك يهتم بالمشروع

وانت من داخل المشروع في حجرة مستقله مثلا حجرة المدير

اتفرغ للشغل اللى انت بتحبه

بسيطه يعنى

اى خدمة

بص يا اخى لو انا منك كنت فتحت اى مشروع صغير وهيبقى ده مظهر ادام الناس ان انا شغال وعندى مشروع والفوركس بقى خليك لنفسك وماتقولش لحد انك شغال فيه وبتكسب والمشروع ده ممكن تخلى اى حد من قرايبك يديره اونت تشرف عليه لكن شغلك الاساسى هيبقى الفوركس بس وخلصت الحكاية لان الناس فعلا مالهاش غير المظاهر لكن اكبر غلط انك تسيب الفوركس بعد ما حققت فيه انجازات كبيرة حراااااااام عليك غيرك بيتمنى حتى يكسب 10 نقط يوميا بشكل ثابت

الوظيفة او الاصول الثابتة كمحل تجاري او عقار يؤجر ويعود بمنفعة يراها الناس كحزام الامان في السيارة يقيك الصدمات المتوقعة فبين يديك دخل ثابت يقيك تقلبات الايام
اما الفوركس او الاسهم لايعتبرها المجتمع عمل اساسي لانها في يوم من الايام قد تتبخر ولاتكون لذلك هي مخاطرة عالية لاتحميك في حال خسرت ... لذلك المجتمع العربي عموما يقدر الرجل الحريص الذي لديه شيء مضمون ويقدرون اكثر من لديه دخل اضافي لايهمش الاساسي .

هم يتخوفون من خسارتك يوماً ما لا سمح الله، فمن الأفضل والأسلم أن تقوم بإنشاء مشروع صغير إلى جانب الفوركس وتعمل بهما معاً

الموضوع مش انهم خايفين انه يخسر

الموضوع انهم اصلا مش فاهمين ولا مقتنعين بشغله

السؤال يقنعهم ازاى ؟ والحل الوحيد انه يثبت لهم ان الفوركس مثله مثل اى عمل اخر بل احيانا افضل

ومش هيقدر يثبت ده غير باللى انا ذكرتة فوق (الناس دائما تبحث عن الاثبات العملى اللى يشفوه بعنيهم)


لازم يشفوا حياتة بتتغير للاحسن ساعتها بس هيسألو انفسهم ازاى قاعد فى البيت وحياتة بتتحسن اكثر مننا

ساعتها بس هيقتنعوا انه فعلا شغال و هيقدروا شغله وزى ماقلت هيتلموا حوليه يقولوا شغلنا معاك ياعمونا

التوقيع